လတ်တလော ကိုဗစ်-၁၉ မျိုးစိတ်သစ်ကို တွေ့ရှိရတဲ့ တောင်ပိုင်းအာဖရိက ၇ နိုင်ငံက နိုင်ငံခြား ခရီးသွားတွေ ပြည်ဝင်ခွင့်မပေးဖို့ ကနေဒါအစိုးရက စီစဉ်နေတယ်လို့ ကျန်းမာရေးဝန်ကြီးက သတင်းထောက်တွေကို နိုဝင်ဘာ ၂၆ ရက်က ပြောပါတယ်။

ဗိုင်းရပ်စ်မျိုးကွဲသစ်ဟာ ကိုဗစ်-၁၉ ကာကွယ်ဆေးကိုလည်း ခံနိုင်ရည်ရှိနေမလားဆိုတာကို သုတေသနပြုနေတဲ့အချိန်မှာ အီးယူ၊ အမေရိကန်ပြည်ထောင်စုနဲ့ ဗြိတိန်တို့ကလည်း နိုင်ငံတွေရဲ့ နယ်စပ်တွေကို တင်းကျပ်ထားလိုက်ပါပြီ။

ကနေဒါကလည်း နိုင်ငံသားတွေရဲ့ ကျန်းမာရေးကို ကာကွယ်နိုင်ဖို့အတွက် တောင်အာဖရိက၊ နမ်မီဘီးယား၊ လီဆိုသို၊ ဘော့စဝါနာ၊ အက်စ်ဝါတီနီ၊ ဇင်ဘာဘွေနဲ့ မိုဇမ်ဘစ်နိုင်ငံကနေ လာမယ့် နိုင်ငံခြားခရီးသွားတွေကို ပြည်ဝင်ခွင့် ပိတ်ပင်သွားမယ်လို့ ဆိုပါတယ်။

Omicron လို့ နာမည်ပေးထားတဲ့ ကိုရိုနာဗိုင်းရပ်စ် မျိုးစိတ်သစ်ကြောင့် သောကြာနေ့ကစလို့ နိုင်ငံတွေဟာ တောင်ပိုင်းအာဖရိကနိုင်ငံတွေဘက်ကနေ လာမယ့် ခရီးသွားတွေကို ပိတ်ပင်လိုက်ကြပါတယ်။

ဒေသတွင်းမှာ စတော့ဈေးနှုန်းတွေလည်း တနှစ်အတွင်း အဆိုးဆုံး အခြေအနေထိ ကျဆင်းသွားပါတယ်။ 

ကမ္ဘာ့ကျန်းမာရေးအဖွဲ့ချုပ်ကတော့ အသစ်တွေ့တဲ့ ဗိုင်းရပ်စ်ဟာ အလျင်အမြန် ကူးစက်နိုင်ဖွယ် ရှိပြီး ကနဦးလေ့လာချက်တွေအရ ရောဂါကူးစက်လို့ ပျောက်ကင်းသွားပြီးရင်တောင် နောက်တဖန် ပြန်လည်ကူးစက်နိုင်တယ်လို့ ဆိုပါတယ်။