တိုက်စစ်ကစားသမား ဖာရန်တောရက်စ်ကလွဲရင် ဒဏ်ရာရခဲ့တဲ့ ကစားသမားအားလုံး ပြန်ကစားနိုင်ပြီလို့ မန်စီးတီးနည်းပြ ဂွါဒီယိုလာက အတည်ပြုပါတယ်။ 

မန်စီးတီးဟာ ဒီဇင်ဘာ ပွဲကျပ်ကာလ ပွဲဦးထွက်မှာ ကစားသမား ၅ ဦးလောက်အထိ ပါဝင်နိုင်ခြင်းမရှိခဲ့တာပါ။ 

လက်ရှိအချိန်မှာတော့  ဖာရန်တောရက်စ် တစ်ဦးသာ ဆက်လက်အနားယူရမှာဖြစ်ပြီး တခြားကစားသမားတွေအားလုံးဟာ မနက်ဖြန်မှာကစားမယ့် ဝက်ဖို့ဒ်နဲ့ပွဲမှာ ပါဝင်ကစားဖို့ အဆင်သင့်ဖြစ်နေပြီလို့ ဂွါဒီယိုလာက ပြောပါတယ်။ 

မန်စီးတီးအသင်းမှာ ကွင်းလယ်လူ ဒီဘရိုင်း၊ ဂွမ်ဒိုဂမ်၊ ဂျွန်စတုန်းစ်နဲ့ ဝေါ်ကာတို့ဟာ ဗီလာကို အနိုင်ရခဲ့တဲ့ပွဲစဉ်ကို လွဲချော်ခဲ့ပြီး အဲဒီမတိုင်ခင်လည်း ဂရေးလစ်ရှ်နဲ့ဖိုဒန်တို့ ဒဏ်ရာအနည်း ငယ်ရခဲ့ပါသေးတယ်။ 

“ကျနော်တို့ အများကြီးပိုကောင်းလာတယ်။ ဗီလာနဲ့ ပွဲမတိုင်ခင်က ပြောခဲ့သလိုပဲ ကစားသမားအားလုံးကို ကျနော်တို့ လိုအပ်ပါတယ်” လို့ ဂွါဒီယိုလာက ပြောပါတယ်။ 

နိုဝင်ဘာလအတွင်း ကစားခဲ့တဲ့ ပွဲစဉ်အားလုံး အနိုင်ရအောင်စွမ်းဆောင်နိုင်ခဲ့တဲ့ ဂွါဒီယိုလာဟာ တစ်လတာအကောင်းဆုံးနည်းပြဆုရဖို့လည်း ရေပန်းစားနေပါတယ်။