ဒေါ့မွန်နဲ့ ဘိုင်ယန်မြူးနစ်အသင်းတို့ရဲ့ပွဲစဉ်မှာ ကိုင်တွယ်ခဲ့တဲ့ ကွင်းလယ်ဒိုင်ဟာ လုပ်ပွဲကစားခဲ့ဖူးတယ်လို့ ဝေဖန်ခဲ့တဲ့ ဘာလင်ဂမ်ဟာ ရဲတပ်ဖွဲ့ရဲ့ စုံစမ်းစစ်ဆေးမှုခံနေရတယ်လို့ သိရပါတယ်။ 

အဲဒီပွဲစဉ်မှာ ဘိုင်ယန်မြူးနစ်ဘက်ကိုပေးခဲ့တဲ့ ပင်နယ်တီနဲ့ ပတ်သက်ပြီး ကွင်းလယ်ဒိုင်ဟာ လုပ်ပွဲ ကစားခဲ့ဖူးသူဖြစ်လို့ ဘာတွေမျှော်လင့်ရမှာလဲလို့ ဒေါ့မွန်ကွင်းလယ်လူ ဘာလင်ဂမ်က မေးခွန်း ထုတ်ခဲ့တာပါ။ 

စကိုင်းဂျာမနီရဲ့ဖော်ပြချက်အရ ဘာလင်ဂမ်ရဲ့ မှတ်ချက်ဟာ အရေးယူခံရနိုင်ပြီး ဒေါ့မွန် အစိုးရရှေ့နေရုံးဆီကို အမူတွဲဖိုင်ရောက်ရှိနေပြီလို့ ဆိုပါတယ်။ 

ဘယ်လိုအရေးယူမလဲဆိုတာ မသိရသေးပေမယ့် ဘာလင်ဂမ်ကို စုံစမ်းစစ်ဆေးနေပြီး ပြစ်မှုထင်ရှားမယ်ဆိုရင် ကြီးမားတဲ့ပြစ်ဒဏ်ချမှတ် ခံရနိုင်တယ်လို့ စကိုင်းဂျာမနီကဖော်ပြခဲ့ပါတယ်။ 

အဲဒီပွဲစဉ်ကို ကိုင်တွယ်ခဲ့တဲ့ ကွင်းလယ်ဒိုင် ဇွယ်ယာဟာ ၂၀၀၅ ခုနှစ်က ဂျာမန်ပြည်တွင်းလိဂ်လုပ်ပွဲကိစ္စမှာ ပါဝင်ပတ်သက်ခဲ့ဖူးလို့ ၆ လပွဲပယ်နဲ့ ဒဏ်ငွေ ချမှတ်ခံခဲ့ရဖူးပါတယ်။ 

ဘိုင်ယန်ကိုပေးတဲ့ ပင်နယ်တီနဲ့ ပတ်သက်ပြီး ဒိုင်လူကြီးဇွယ်ယာကတော့ VAR နဲ့ ပြန်စစ်ဆေးပြီး သေချာမှသာ ပင်နယ်တီပေးခဲ့တာဖြစ်ကြောင်း ရှင်းလင်းထားပါတယ်။