ရုရှားက ယူကရိန်းကို ကျူးကျော်သိမ်းပိုက်ခဲ့မယ်ဆိုရင် တန်ဖိုးကြီးကြီး ပြန်ပေးဆပ်ရမှာ ဖြစ်ပြီး စီးပွားရေးအရ ဆိုးရွားတဲ့အကျိုးဆက်တွေနဲ့ပါ ရင်ဆိုင်ရမယ်လို့ ရုရှားသမ္မတ ဗလာဒီမာပူတင်ကို အမေရိကန်သမ္မတ ဂျိုးဘိုင်ဒင်က  သတိပေးပြောကြားလိုက်ပါတယ်။ 

ရုရှားက ယူကရိန်းကို နယ်မြေကျူးကျော်ခဲ့ရင် အမေရိကန်ရဲ့ ခြေလျင်တပ်တွေကို စေလွှတ်ဖို့ ရှိသလားဆိုတဲ့ မေးခွန်းကိုတော့ သမ္မတဘိုင်ဒင်က အစီအစဉ် မရှိသေးဘူးလို့  ဒီဇင်ဘာ ၁၁ ရက်နေ့မှာ သတင်းထောက်တွေကို ပြောပါတယ်။

ဒါပေမဲ့ လုံခြုံရေးလိုအပ်ချက်အရ အမေရိကန်နဲ့ နေတိုး မဟာမိတ်တပ်ဖွဲ့တွေဟာ အရှေ့ဘက်ကို တပ်တွေ စေလွှတ်ဖို့ လိုအပ်မယ်လို့ ပြောပါတယ်။

ယူကရိန်း အရေးနဲ့ပတ်သက်လို့ ပူတင်ကို ရှင်းရှင်းလင်းလင်းပြောခဲ့တာက ခြေလှမ်းတွေ ဆက်တိုးနေမယ်ဆိုရင် ရုရှားစီးပွားရေးမှာ ဆိုးဆိုးရွားရွား၊ အလွန် ဆိုးဆိုးရွားရွား အကျိုးသက်ရောက်မှုတွေ ကြုံစေရမယ် ဆိုတာပါပဲလို့ သမ္မတ ဘိုင်ဒင်က ပြောပါတယ်။ 

သမ္မတ ဘိုင်ဒင်ဟာ အရင်တပတ်က သမ္မတ ပူတင်နဲ့ ၂ နာရီကြာအောင် တယ်လီဖုန်း စကား ပြောဆိုခဲ့ပြီး ရုရှားက ယူကရိန်းကို ကျူးကျော်မယ်ဆိုရင် ကမ္ဘာမှာ ရုရှားရဲ့ နေရာဟာ သိသိသာသာ ပြောင်းလဲသွားလိမ့်မယ်လို့ သတိပေးခဲ့ပါတယ်။