အစ္စရေးနိုင်ငံ၊ ပင်လယ်နီ အပန်းဖြေစခန်း အီလတ်မြို့မှာ  ဒီဇင်ဘာ ၁၃ ရက်က  ကျင်းပတဲ့ အကြိမ် ၇၀ မြောက် မယ်စကြာဝဠာပြိုင်ပွဲမှာ အိန္ဒိယအလှမယ် ဟာနက်ဇ်စံဒူဟာ မယ်စကြဝဠာ သရဖူဆု ရရှိသွားပါတယ်။

အိန္ဒိယဟာ မယ်စကြဝဠာသရဖူကို နောက်ဆုံးဆွတ်ခူးခဲ့တာ ၂၁ နှစ်ရှိပြီဖြစ်ပြီး ခုတခါ ထပ်ရတာမို့ သရဖူကို တာဝန်ယူဖို့ အခုအသင့်ဖြစ်နေပါပြီလို့ စံဒူက ပြောပါတယ်။

ကိုရိုနာဗိုင်းရပ်စ် ဗီဇမျိုးကွဲ အိုမီခရွန် ကူးစက်မှု ထိန်းချုပ်နိုင်ရေး ကြိုးစားတဲ့အနေနဲ့ ခရီးသွားလာမှု တားမြစ်ပိတ်ပင်အပြီး ကူးစက်နှုန်းမြင့်တက်နေချိန်မှာ ဒီပွဲကို ကျင်းပတာပါ။ စံဒူကတော့ နယ်စပ်တွေကို ဖွင့်ထားနိုင်ရေး ကူညီဖို့ ကမ္ဘာတဝန်းက ပြည်သူတွေ ကာကွယ်ဆေး ထိုးနှံကြဖို့ တိုက်တွန်းခဲ့ပါတယ်။

ပြိုင်ပွဲမစခင် သီတင်းပတ်တွေအတွင်း မယ်စကြဝဠာ အလှမယ်ပြိုင်ပွဲဝင်တွေဟာ ခရစ်ယာန်ဘာသာရဲ့ အမြင့်မြတ်ဆုံး နေရာတခုဖြစ်တဲ့ ဂျေရုဆလင်မြို့က Holy Sepulchre ခရစ်ယာန်ဘုရားကျောင်းနဲ့ ဂျူးဝါဒီတွေရဲ့ အနောက်ဘက်တံတိုင်း အပါအဝင် အစ္စရေးနိုင်ငံ အတွင်းက နေရာ အသီးသီးကို လှည့်လည်သွားလာခဲ့တာပါ။

ခရီးသွား ကန့်သတ်ချက်တွေကြောင့် မယ်စကြဝဠာပြိုင်ပွဲ တက်ရောက်သူတွေနဲ့ မီဒီယာတွေကို ကန့်သတ်ထားခဲ့ရတယ်လို့ အစ္စရေး ခရီးသွားလုပ်ငန်း ဝန်ကြီးဌာနက ပြောထားပါတယ်။