မကွေးတိုင်း၊ ပခုက္ကူမြို့နယ်မှာ ဒီဇင်ဘာ ၁၃ ရက် မနက်ပိုင်းက စစ်ကောင်စီတပ်သားတွေလိုက်ပါလာတဲ့ ကား   ၂ စီးကို မြစ်ခြေ/ကျွန်းချောင်းPDFနဲ့ ပခုက္ကူ PDFတို့ ပူးပေါင်းပြီး မိုင်းဆွဲ တိုက်ခိုက်ရာ စစ်ကောင်စီတပ်သား ၇ ယောက်လောက်သေဆုံးပြီးတော့ ၈ ယောက်လောက် ဒဏ်ရရရှိသွားတယ်လို့ ဒေသခံကာကွယ်ရေး တပ်တွေဘက်က ပြောပါတယ်။

ပခုက္ကူမြို့နယ် တန့်ကြည့်တောင်အနောက်ဘက်ကနေ ယောဘက်ကိုတက်လာတဲ့ စစ်ကောင်စီတပ်ဖွဲ့ဝင်တွေလိုက်ပါလာတဲ့ ကား ၂ စီးကို ဒီကနေ့ မနက် ၈ နာရီလောက်က MC/KC-PDFနဲ့ PKU-PDF တို့ပူးပေါင်းပြီး  မိုင်း ၉ လုံးဆွဲတိုက်ခိုက်ခဲ့တာလို့ MC/KC-PDF တပ်ဖွဲ့ရဲ့ ပြန်ကြားရေးတာဝန်ခံက ဒီဗွီဘီကိုပြောပါတယ်။

“သူတို့က ပခုက္ကူဘက်ကနေ ယောနယ်ဘက်ကိုတတ်လာတာ။ ရှေ့မြို့နယ်အုပ်ချုပ်ရေးမှူးက ပရဟိတကားတစ်စီးကို ယူလာပြီးတော့ လာတာကို သတင်းကြိုရလို့ လမ်းကနေစောင့်ပြီး မိုင်းခွဲလိုက်တာ မိနစ် ၂၀ လောက် အပြန်အလှန်တိုက်ပွဲ ဖြစ်ခဲ့တယ်။ သူတို့ဘက်က ၇ ယောက်လောက်သေပြီးတော့ ၈ ယောက်လောက်ဒဏ်ရာရသွားတယ်။ အဲဒါနဲ့ အလောင်းတွေနဲ့ ဒဏ်ရာရသူတွေကို ဇွတ်တရွတ် ကောက်တင်ပြီးနောက်ပြန်လှည့်ပြေးသွားတယ်။”

အဲဒီဖြစ်စဥ်နဲ့ ပတ်သက်လို့ သေဆုံးဒဏ်ရရတဲ့ အခြေနေကို အသေးစိတ် သိရှိနိုင်ဖို့ ပခုက္ကူမြို့နယ် ရဲတပ်ဖွဲ့မှူးရုံးကို တယ်လီဖုန်းနဲ့ ဆက်သွယ်ခဲ့ပေမယ့် ဖုန်းလက်ခံဖြေကြားခြင်းမရှိပါဘူး။

မကွေးတိုင်းမှာ စစ်ရေးအရှိန်ဟုန်တိုးမြှင့် လုပ်ဆောင်နေတာကြောင့် မိဘပြည်သူတွေအနေနဲ့ အိမ်စီးကားတွေကို မှန်ချပြီးမှ မောင်းနှင်ကြဖို့နဲ့ အကြမ်းဖက်စစ်အုပ်စုနဲ့ နီးစပ်တဲ့နေရာတွေကို ရှောင်ကြဖို့ ပြည်သူ့ကာကွယ်ရေးတပ်ဖွဲ့ အသီးသီးက သတိပေးထားပါတယ်။