စပိန်နိုင်ငံ ဘာစီလိုနာနဲ့ ဘီလ်ဘောင်းမြို့ကြီးတွေမှာ  ဒီဇင်ဘာ ၁၈ ရက်က  ကိုဗစ်-၁၉ ကာကွယ်ဆေးကို ဆန့်ကျင်သူတွေ က ချီတက်ဆန္ဒပြခဲ့ပါတယ်။ 

လူပေါင်း ရာကျော်ချီတက်ခဲ့ပြီး သူတို့က ကာကွယ်ဆေးနှစ်ကြိမ်ထိုးတဲ့လက်မှတ် ပြသနိုင်မှ စားသောက်ဆိုင်တွေ၊ ဘားတွေ၊ ဆေးရုံနဲ့ အားကစားရုံတွေထဲ ဝင်ရောက်ရမယ်ဆိုတာကို ဆန့်ကျင် ဆန္ဒပြကြတာပါ။

ဘာစီလိုနာမှ အသက် ၅၇ နှစ်ရှိ ဆန္ဒပြသူအမျိုးသမီးက “ကျမကိုယ်တိုင် ဘာမှန်းမသိတဲ့အရာကို ထိုးဖို့ ဆန့်ကျင်ပါတယ်။ ဒီဆေးရဲ့ side effects က ဘာဖြစ်မယ်မှန်း မသိဘူး၊ ကာကွယ်ဆေးကြောင့်  သေတဲ့လူတွေ ရှိနေတာပဲ။ မီဒီယာတွေက ဒါကို ရှင်းမပြဘူး။ ဒီကာကွယ်ဆေးက  လူတွေကို သတ်နေတာ၊  အဲဒါကြောင့် ချီတက်ဆန္ဒပြရတာ” လို့ ပြောပါတယ်။

စပိန်တနိုင်ငံလုံး ကာကွယ်ဆေးထိုးပြီးသူ ၈၀ ရာခိုင်နှုန်းရှိပါပြီ။ အခုနောက်ဆုံးဝင်လာတဲ့ ကိုဗစ်လှိုင်းအတွက် ဂျာမနီနဲ့ ဩစတြီးယားတို့လိုပဲ ခရီးသွားလာမှုနဲ့ လူမှုဆက်ဆံရေးအပေါ်  တင်းကြပ်တဲ့ ကန့်သတ်အမိန့်တွေ ထုတ်ထားပါတယ်။

ဒီဇင်ဘာ ၁၇ ရက်မှာ စပိန်ကျန်းမာရေးဝန်ကြီးဌာနက လူတစ်သိန်းမှာ ကူးစက်ခံရသူ ၅၀၀ နှုန်း ရှိနေပြီး အလွန်စိုးရိမ်ဖွယ်အခြေအနေလို့ ထုတ်ပြန်ပါတယ်။ 

ပြီးခဲ့တဲ့ ၁၄ ရက်အတွင်း ကူးစက်ခံရသူ ၃၃၃၅၉ ဦး ရှိပြီး ၄၁ ဦး သေဆုံးခဲ့ပါတယ်။