တူနီးရှားနိုင်ငံတရားရုံးက ပြင်သစ်မှာခိုလှုံနေထိုင်နေတဲ့ ယခင်သမ္မတဟောင်း မွန်ဆက်ဖ်မာဇူကီကို မျက်ကွယ်ထောင်ဒဏ် ၄ နှစ် ချမှတ်လိုက်ပါတယ်။

လက်ရှိတူနီးရှားသမ္မတ ကိုင်စ်ဆေးဒ်ကို ဝေဖန်မှုနဲ့ မကြာခင်ကဖြစ်ခဲ့တဲ့ ဆန္ဒပြပွဲတွေမှာ လှုံဆော်မှု စတဲ့စွဲချက်တွေနဲ့ သမ္မတဟောင်းဟာ နိုင်ငံတော်လုံခြုံရေးကို ပြည်ပကနေ နှောင့်ယှက်နေတယ်လို့ တရားရုံးက  ဆုံးဖြတ် ထောင်ဒဏ်ချမှတ်လိုက်တာဖြစ်ပါတယ်။

သမ္မတဟောင်းမာဇူကီက လက်ရှိသမ္မတဟာ ဇူလိုင်လမှာ အာဏာသိမ်းယူခဲ့တယ်လို့ ပြောဆိုပြီး သမ္မတကို လူထုတွေ ဆန္ဒပြကြဖို့နဲ့ သူ့ကိုဖယ်ရှားရာမှာ  နိုင်ငံတကာက ဝိုင်းဝန်းကူညီဖို့ တောင်းဆိုခဲ့ပါတယ်။

သမ္မတကိုင်စ်ဆေးဒ်ကတော့ အာဏာသိမ်းတာ၊ ပါလီမန်ကို ရပ်ဆိုင်းတာ၊ အခြေခံဥပဒေကို လိုသလိုပြောင်းလဲတာတွေဟာ လုံးဝမဟုတ်ဘူးလို့ ငြင်းဆိုပါတယ်။ 

နောက်နှစ်မှာ အခြေခံဥပဒေသစ်အတွက် ပြည်သူ့ဆန္ဒခံယူပွဲတွေ ကျင်းပပြီးရင် လွှတ်တော်ရွေးကောက်ပွဲတွေ ကျင်းပပေးမယ်လို့ ပြောပါတယ်။  

တူနီရှားဟာ ၂၀၁၁ မှာ လူထုအုံကြွမှုနဲ့ ဒီမိုကရေစီအပြောင်းအလဲ စတင်ခဲ့ပြီး မာဇူကီကို  ကြားဖြတ်သမ္မတ တင်မြှောက်ခဲ့ပါတယ်။ မာဇူကီက ၂၀၁၄ မှာ တူနီရှားအခြေခံဥပဒေသစ်ကို ပြဋ္ဌာန်းပေးခဲ့ပြီးနောက် အာဏာလွှဲပေး ခဲ့ပါတယ်။