ကရင်ပြည်နယ်အတွင်း စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော် (KNLA) တပ်တို့ ဒီဇင်ဘာလ ၃၁ ရက်နေ့ တရက်တည်း တိုက်ပွဲ ၅ ကြိမ်ဖြစ်ပွားခဲ့တယ်လို့ သိရပါတယ်။

ကရင်အမျိုးသားအစည်းအရုံ (KNU) တပ်မဟာ ၁ ထိန်းချုပ်နယ်မြေ သထုံခရိုင် ဝီယော်တံတားထိပ် တိုက်ပွဲမှာ စစ်ကောင်စီတပ်က ၉ ဦးနဲ့ ကရင်လေးဆိပ်ကမ်း တိုက်ပွဲမှာ ၁ ဦးကျဆုံးခဲ့တယ်လို့ KNLA တပ်ဖွဲ့ဝင်တဦးက ပြောပါတယ်။

အလားတူ ကော့ကရိတ်မြို့အရှေ့ဘက် ၂ မိုင်ခန့် မြို့ဟောင်းရွာ (အံကလော်ရွာ) နားနဲ့ ကြာအင်းဆိပ်ကြီး၊ လေးကေ့ကော်မြို့တို့မှာလည်း တိုက်ပွဲဖြစ်ပွားခဲ့ပြီး ထိခိုက်သေဆုံးမှု အခြေအနေကိုတော့ မသိရသေးဘူးလို့ ဆိုပါတယ်။

စစ်ကောင်စီတပ်က KNU ထိန်းချုပ်နယ်မြေအတွင်း ကျူးကျော်လာတာကြောင့် အခုလို တိုက်ပွဲဖြစ်ပွားနေတာလို့ KNLA တပ်ဖွဲ့ဝင်က ပြောပါတယ်။

ကရင်ပြည်နယ်အတွင်း ဒီဇင်ဘာ ၁၅ ရက်ကစတင်ပြီး စစ်ကောင်စီနဲ့ KNLA၊ PDF ပူးပေါင်းတိုက်ပွဲတွေ ၂ ပတ်ကျော်ကြာ ဖြစ်ပွားနေတာပါ။

တိုက်ပွဲကြောင့် ကျေးရွာပေါင်း ၉ ရွာက စစ်ဘေးရှောင် ၁၄၀၀၀ လောက် ထိုင်း-မြန်မာနယ်စပ် မြန်မာဘက်ခြမ်း သောင်ရင်းမြစ်ကမ်းတလျှောက်နဲ့ ထိုင်ဘက်ခြမ်းတို့မှာ ထွက်ပြေး တိမ်းရှောင်နေကြရပါတယ်။

တိုက်ပွဲကြောင့် ထွက်ပြေးတိမ်းရှောင်နေရတဲ့ စစ်ရှောင်ပြည်သူတွေရဲ့ နေအိမ်တွေကို စစ်ကောင်စီတပ်က ဖျက်ဆီးပြီး ကား၊ ဆိုင်ကယ် အစီးရေ ရာချီအပါအဝင် ပစ္စည်းတွေကို ခိုးယူနေကြတယ်လို့ စစ်ရှောင်ပြည်သူတွေဆီက သိရပါတယ်။