မန္တလေး Eco Max တာယာကြိတ်စက်ရုံ မီးလောင်
2
မန္တလေးတိုင်း၊ ပြည်ကြီးတံခွန်မြို့နယ်၊ (ဆ) ရပ်ကွက်၊ လမ်း ၁၃၀ နဲ အေးသုခလမ်းကြားရှိ Eco Max တာယာပြန်ကြိတ်စက်ရုံမှာ ဒီကနေ့ ဇန်နဝါရီ ၃ ရက်နေ့ မနက်စောက မီးလောင်မှုဖြစ်ပွားခဲ့တယ်လို့ သိရပါတယ်။
အမည်မဖော်လိုတဲ့ ဒေသခံတဦးက “စက်ရုံထဲမှာ ၄ နာရီ ၃၀ မိနစ်လောက်က မီးလောင်တာ။ ဘာကြောင့်လည်းတော့ မပြောတတ်ဘူး။ မကြားသေးဘူး” လို့ ပြောပါတယ်။
မီးလောင်ရာကို ပြည်ကြီးတံခွန်မြို့နယ်၊ မီးသတ်တပ်ဖွဲ့အပါအဝင် နယ်မြေခံမီးသတ်တပ်ဖွဲ့တွေနဲ့ မီးသတ်ယာဉ်တွေ လာရောက်မီးငြိမ်းသတ်ကြတယ်လို့ သိရပါတယ်။
“၅ နာရီ ၇ မိနစ်မှာ မီးထိန်းနိုင်ပြီး ၅ နာရီ ၁၀ မိနစ်မှာတော့ မီးငြိမ်းသတ်နိုင်ခဲ့ပါတယ်” လို့ ပြည်ကြီးတံခွန်မြို့နယ် မီးသတ်တပ်ဖွဲ့ရုံးတာဝန်ရှိသူတဦးက ပြောပါတယ်။
မီးလောင်မှုဖြစ်စဉ်နဲ့ပတ်သက်ပြီး စတင်လောင်ကျွမ်းမှုနဲ့ ပျက်စီးဆုံးရှုံးမှုတန်ဖိုးကိုတော့ မသိရသေးဘူးလို့ ဆိုပါတယ်။
