ကရင်ပြည်နယ်၊ သံတောင်ကြီးမြို့နယ်၊ ကေအန်ယူ- တပ်မဟာ ၂ ထိန်းချုပ်နယ်မြေ လေလော်ဒေးကျေးရွာ လိပ်သိုလ်မြို့ခွဲနဲ့ လွိုင်ကော်လမ်းမကြီးအနီး ကျောက်လုံးကြီးတပ်စခန်းက စစ်ကောင်စီရဲ့တပ်ဖွဲ့ဝင် ၃ ယောက် မိုင်းဆွဲတိုက်ခိုက်ခံရတဲ့အတွက် သေဆုံးသွားတယ်လို့ ဒေသခံတွေဆီက သိရပါတယ်။

ဇန်နဝါရီ ၆ ရက် မနက် ၉ နာရီလောက်က စစ်ကောင်စီရဲ့ ခလရ ၆၀၄ တပ်ရင်းက တပ်ဖွဲ့ဝင် ၃ ဦးဟာ ကျောက်လုံးကြီးတပ်စခန်းပေါ်ကနေ ရေဆင်းခပ်ရင်း အမည်မသိလက်နက်ကိုင်အဖွဲ့ရဲ့ မိုင်းဆွဲတိုက်ခိုက်တာခံခဲ့ရတာလို့ ဆိုပါတယ်။

လေလော်ဒေးကျေးရွာသား တစ်ဦးက”အသံတော့ ကြားတယ်။ စကစက လက်နက်ကြီးပစ်တယ်ထင်တာ။ နောက်မှသိရတာက မိုင်းဆွဲခံရလို့ သူတို့ တပ်ဖွဲ့ဝင် ၃ ယောက် သေသွားတယ်ဆိုတာ သိရတယ်”လို့ ဆိုပါတယ်။

အလားတူ ဒီဇင်ဘာလက လိပ်သိုလ်မြို့အထူးဒေသ မင်းလမ်းတောင်အုပ်စု ချဉ်ပတောင်ကျေးရွာနဲ့ အာမရာ ကျေးရွာကြား လမ်းကင်းဝပ်နေတဲ့ စစ်ကောင်စီတပ်ဖွဲ့ဝင်တွေဟာ ဗုံးနဲ့ပစ်ခတ်တိုက်ခိုက်ခံခဲ့ရတဲ့အတွက် ၂ ဦးသေဆုံးပြီး ၁ ဦးပြင်းထန်ဒဏ်ရာ ရရှိခဲ့ပါတယ်။

ကရင်ပြည်နယ် KNU နဲ့ ကယားပြည်နယ် KNDF ထိန်းချုပ်နယ်မြေတွေကို စစ်ကောင်စီရဲ့တပ်တွေက တောင်ငူ- သံတောင်- ဘောဂလိ- လွိုင်ကော်လမ်းပိုင်းကို အသုံးပြုကာ လူ၊ လက်နက်ခဲယမ်းဖြည့်တင်းပြီး စစ်ယာဉ်တန်းတွေနဲ့အတူ အရပ်သားကားတွေပါရောပြီး နယ်မြေကျော် သွားလာနေတဲ့အတွက် မကြာခဏ မိုင်းဆွဲတိုက်ခံရတယ်လို့ ကေအန်ယူသတင်းရင်းမြစ်ထံက သိရပါတယ်

Photo-Taw Oo Karen News