ဆေးအာနိသင်ထိန်း ကာကွယ်ဆေးထိုးဆေးကို အချိန်တိုအတွင်း ထပ်ခါတလဲ ထိုးနှံတာဟာ ကိုဗစ်-၁၉ ကပ်ရောဂါအတွက် ရေရှည်တုံ့ပြန်ချက်မဟုတ်ဘူးလို့ ဥရောပသမဂ္ဂ ဆေးဝါးကြီးကြပ်ရေး တရားဝင်အဖွဲ့ကြီး EMA က ဇန်နဝါရီ ၁၁ ရက်မှာ ပြောလိုက်ပါတယ်။

ထိလွယ်ရှလွယ် အရှိဆုံးလူတွေအတွက် ဒုတိယမြောက် ဆေးအာနိသင်ထိန်း ထိုးဆေးဟာ မရှိမဖြစ် လုပ်ဆောင်ချက် ဖြစ်နိုင်ပေမဲ့ မကြာခဏ ထပ်ခါတလဲ ထိုးနေတာကတော့ ရေရှည်အတွက် အလားအလာကောင်း မဟုတ်ဘူးလို့ EMA ရဲ့ ကာကွယ်ဆေးဗျူဟာဆိုင်ရာဌာန အကြီးအကဲ မာကိုကာဗာလေရီက သတင်းစာရှင်းလင်းပွဲမှာ ပြောပါတယ်။

“ထပ်ခါတလဲ ဆေးထိုးနေရင် ကျနော်တို့ဟာ ကိုယ်ခံအားတုံ့ပြန်မှုမှာ ပြဿနာရမယ့် အလားအလာနဲ့ အဆုံးသတ်သွားလိမ့်မယ်။ ကိုယ်ခံအားတုံ့ပြန်ချက်ဟာလည်း ကျနော်တို့ ဖြစ်ချင်သလို အဆုံးသတ်ကောင်းမှာ မဟုတ်ဘူး။” 

အစ္စရေးဟာ အိုမီခရွန်ဗီဇမျိုးကွဲ ကူးစက်မှုတိုးနေချိန်မှာ ကျန်းမာရေးစောင့်ရှောက်မှု လုပ်သားတွေနဲ့ ကိုယ်ခံအားပြဿနာရှိတဲ့ လူနာတွေ၊ အသက် ၆၀ နဲ့အထက် လူကြီးတွေအတွက် ဖိုက်ဇာ ဘိုင်အိုအန်တက်ခ် ကုမ္ပဏီထုတ် ထိုးဆေးကို လေးကြိမ်မြောက် ထိုးပေးဖို့ စီစဉ်ကြီးကြပ် နေပါပြီ။