မြန်မာနိုင်ငံမှာ စစ်အာဏာသိမ်းပြီးတဲ့နောက် နိုင်ငံရေးမတည်ငြိမ်မှု၊ အသက်အိုးအိမ်လုံခြုံ မှုမရှိ၊ စားဝတ်နေရေး ခက်ခဲတာကြောင့် ထိုင်းနိုင်ငံထဲဝင်ရောက်လုပ်ကိုင်ဖို့ ကြိုးစားကြတာမှာ နေ့စဉ်ရာနဲ့ချီ အဖမ်းခံနေကြရပါတယ်။

ဖေဖော်ဝါရီ ၂ ရက်နဲ့ ၃ ရက်နေ့တွေက ကန်ကျနပူရီနဲ့ ပရကျူတ်ခီရီခန်ခရိုင်ထဲမှာ တရားမဝင် ဝင်ရောက်လာတဲ့ မြန်မာ ၂၅၃ ဦး (ကျား ၁၅၈ နဲ့ မ ၉၅)၊ လမ်းပြ ၅ ဦးနဲ့ကား ၂ စီး တို့ကို ဖမ်းဆီးရမိတယ်လို့ ထိုင်းစစ်တပ် Army PR Center သတင်းမှာ ဖော်ပြပါတယ်။ 

ကန်ကျနပူရီမှာဆိုရင် ၁၃၆ ဦး (ကျား ၈၂ နဲ့ မ ၅၄) ဦး ဖမ်းမိပြီး ကန်ကျနပူရမြို့နယ် ဘန့်ကောင်အုပ်စု၊ ဆိုင်းယုတ်မြို့နယ် ကျရခဲ့အုပ်စု၊ ဒန်မခန်တေ့မြို့နယ် ခေါင်ချန့်အုပ်စု ဆန်ခလပူရီမြို့နယ် နောင်လူးအုပ်စုထဲက နေရာပေါင်း ၅ ခုကနေ ဖမ်းမိခဲ့ကြောင်း၊ အဲဒီထဲမှာ ကုန်တင်ကားထဲ အလုံပိတ်ပြီး ပြွပ်သိပ်ကြပ်ညှပ်လိုက်လာသူတွေလည်း ပါတယ်လို့ ဆိုပါ တယ်။

ထိုင်းနိုင်ငံအနောက်ပိုင်း ပရကျူတ်ခီရီခန်ခရိုင်ထဲမှာတော့ ပရကျုတ်ခီရီခန်မြို့နယ် အောဝ်နွဲ့၊ ဘော်နုတ်၊ မာ့ခန်ဖုန်း၊ ကော်လတ် စတဲ့ကျေးရွာအုပ်စု ၄ ခုထဲကနေ  ၁၁၇ ဦး (ကျား ၇၆ ၊ မ ၄၁) ဖမ်းမိတယ်လို့ ဆိုပါတယ်။ 

ဖမ်းဆီးခံရတွေဟာ ပဲခူး၊ မော်လမြိုင်၊ မြိတ်၊ မကွေး၊ ထားဝယ်၊ ရန်ကုန်၊ မန္တလေး စတဲ့ ဒေသကဖြစ်ပြီး ဘန်ကောက်၊ စမွတ်စခွန်းနဲ့ ထိုင်းနိုင်ငံအတွင်းပိုင်းမှာ လာရောက်လုပ်ကိုင်ဖို့ ပွဲစားအား တစ်ဦးလျှင် ဘတ် ၁၈၀၀၀ မှ ၂၅၀၀၀ အထိ ပေးခဲ့ရတယ်လို့ ဆိုပါတယ်။