ကချင်ပြည်နယ်၊ ဖားကန့်မြို့နယ်၊ နန့်ယားတောင်ပိုင်း မာနော့မှော်ကျေးရွာဘက်မှာ ကေအိုင်အေနဲ့ စစ်ကောင်စီတပ်တို့ တိုက်ပွဲပြင်းထန်နေပြီး စစ်ကောင်စီဘက်က လေယာဉ်နဲ့ လာရောက်ပစ်ခတ်ခဲ့တယ်လို့  ဒေသခံတွေက ပြောပါတယ်။ 

တိုက်ပွဲပြင်းထန်နေတဲ့ မာနော့မှော်ဘက်ကို မွန်းလွဲပိုင်းက စစ်ကောင်စီတပ်ဂျက်လေယာဉ် ၂စီး၊ ရဟတ်ယာဉ် ၁ စီးနဲ့ လာရောက်ပစ်ခတ်ခဲ့ပြီး နန့်ယားရှိ စစ်ကောင်စီတပ်စခန်းကလည်း လက်နက်ကြီးနဲ့ ပစ်ခတ်မှုတွေ ရှိနေတယ်လို့ ဆိုပါတယ်။ 

"တိုက်ပွဲကမနေ့က ညနေ ၅ နာခွဲလောက်ကတည်းက ဖြစ်တာ။ ညကနားပြီး မနက်ပိုင်း ၇ နာရီလောက်မှာ ပြန်တိုက်ကြတာ။ နေ့လယ်  ၁၂ လောက်က လေယာဉ်နဲ့ လာပစ်ကြတာ။ အစက ဂျက်လေယာဉ် ၂ စီး ဟုတ်တယ်။ နောက်မှာ ရဟတ်ယာဉ် ၁ စီးနဲ့ ပြန်လာပစ်တယ်။ နန့်ယားက စစ်ကောင်စီတပ်စခန်းကလည်း အဲ့တိုက်ပွဲဖြစ်တဲ့ဘက်ကို လက်နက်ကြီးနဲ့ ပစ်တာ အချက် ၃၀ကျော် ၄၀ လောက်ရှိမယ်ထင်တယ်။ စစ်ကောင်စီဘက်က အကျအဆုံးများလို့ လေယာဉ်နဲ့ ပစ်ကူတာထင်တယ်။ ​အနီးအနားက ရွာတွေတော့ လက်နက်ကြီးကျတာတွေ ရှိလောက်တယ်။ ကားလမ်းနဲ့တော့ ဝေးပါတယ်။ ခရီးသွားကားတွေကတော့ သွားနေကြတယ်။ တိုက်ပွဲကတော့ အခုညနေအထိ ဖြစ်နေတုန်းပဲ'' လို့ ဒေသခံတစ်ဦးက ပြောပါတယ်။ 

တိုက်ပွဲဖြစ်ပွားနေတဲ့ စစ်ကောင်စီတပ်ဖွဲ့ဟာ ဇန်နဝါရီ ၂ ရက်နေ့က စစ်အင်အား ၈၀ လောက်နဲ့ ကားမိုင်းမြို့ဘက်က တက်လာတဲ့ အဖွဲ့ဖြစ်ပြီး ကေအိုင်အေတပ်မဟာ ၉ လက်အောက် တပ်ရင်း ၄၄ အဖွဲ့က လမ်းခုလမ်းမှာ စောင့်ကြိုတိုက်ခိုက်ခဲ့တာ ဖြစ်တယ်လို့ သိရပါတယ်။ 

စစ်ကောင်စီတပ်နဲ့ ကေအိုင်အေတို့ ဖေဖော်ဝါရီ ၄ ရက် မနက်ပိုင်း ၇ နာရီလောက်က ပြန်လည်တိုက်ပွဲဖြစ်ပွားခဲ့ပြီး ညနေပိုင်းအထိလည်း တိုက်ပွဲ ပြင်းထန်နေတယ်လို့ ဆိုပါတယ်။ 

လက်ရှိတိုက်ပွဲဖြစ်ပွားနေတဲ့နေရာဟာ ဖားကန့်သွားလမ်းမပေါ်ရှိ ဆိုင်းဖရာကျေးရွာရဲ့ မြောက်ဘက်ခြမ်းရှိ ၃ မိုင်ခန့်ဝေးတဲ့ နေရာမှာ ဖြစ်ပါတယ်။