ထိုင်းနိုင်ငံမှ မြဝတီသို့ ပြန်ဝင်လာသူ ၇၀ ခန့် ကိုဗစ်ကူးစက်ခံထားရ
မြန်မာ-ထိုင်းနယ်စပ် မဲဆောက်ကတဆင့် မြဝတီမြို့ဘက်ကို ပြန်လာတဲ့လာ မြန်မာနိုင်ငံသား ၇၀ လောက် ကိုဗစ်-၁၉ ကူးစက်ခံထားရတယ်လို့ မြန်မာနိုင်ငံလူမှုကယ်ဆယ်ရေးအဖွဲ့ချုပ် (ဗဟို)က သတင်းထုတ်ပြန်ပါတယ်။
ဖေဖော်ဝါရီ ၁၆ နဲ့ ၁၈ ရက်တွေက မြန်မာနိုင်ငံသား ၆၇ ယောက်မှာ ကိုဗစ်ပိုး စစ်ဆေး တွေ့ရှိခဲ့တာလို့ ဆိုပါတယ်။
မဲဆောက်မှတဆင့် မြဝတီမြို့ဘက်ကို နေရပ်ပြန်မြန်မာနိုင်ငံသား တစ်ရက်ခြား အယောက် ၂၀၀ လက်ခံပြီး မြဝတီမြို့ ကွာရန်တင်းစင်တာတွေမှာ ထားရှိတယ်လို့ ဆိုပါတယ်။
ဖေဖော်ဝါရီ ၁၆ ရက် ညပိုင်းမှာ ကျောက်လုံးကြီး ကွာရန်တင်းစခန်းမှာ ၃၁ ဦး၊ မြဝတီမြို့ကုန်သွယ်ရေးဇုန် ကွာရန်တင်းစင်တာမှာ ဖေဖော်ဝါရီ ၁၈ ရက်နေ့က ကိုဗစ်လူနာ ၃၆ ဦး စုစုပေါင်း ၆၇ ဦး တွေ့ရှိခဲ့တာလို့ မြန်မာနိုင်ငံလူမှုကယ်ဆယ်ရေးအဖွဲ့ချုပ်ဗဟို ဦးလှထွန်းက ပြောပါတယ်။
ကိုဗစ်-၁၉ အတည်ပြုလူနာ ၆၇ ဦးနဲ့ ထိစပ်ခဲ့သူ ကျောက်လုံးကြီးစခန်းက အယောက် ၆၀ နဲ့ ကုန်သွယ်ရေးဇုန်က ၅၄ ယောက်တို့ကိုတော့ ရွှေမြဝတီကွာရန်တင်းစင်တာမှာ ထားရှိတယ်လို့ ဆိုပါတယ်။
ကိုဗစ်-၁၉ ကူးစက်မှု များလာတာကြောင့် ပြည်သူတွေအနေနဲ့ မလိုအပ်ဘဲ ခရီးမသွားဖို့နဲ့ မဖြစ်မနေထွက်ရပါက Mask တပ်ပြီး ထွက်ကြဖို့လည်း တိုက်တွန်းထားပါတယ်။
