ကချင်ပြည်နယ်မြောက်ပိုင်း၊ ပူတာအိုမြို့နယ်၊ လုံရှာယန်ရွာဘက်မှာ ပြီးခဲ့တဲ့ ဖေဖော်ဝါရီ ၁၈ ရက်ကနေ  ဒီနေ့ထိ စစ်ကောင်စီနဲ့ ကချင်လွတ်မြောက်ရေးတပ်မတော် (KIA)၊ ပြည်သူ့ကာကွယ်ရေးတပ်ဖွဲ့ (PDF) ပူးပေါင်းတပ်တို့အကြား တိုက်ပွဲပြင်းထန်လာတာကြောင့် ဒေသခံ ထောင်ချီ ထွက်ပြေးတိမ်းရှောင်ရတယ်လို့ သိရပါတယ်။ 

“စစ်ကောင်စီဘက်က လုံရှာယန်ရွာခံတွေကို ဒီနေ့ နောက်ဆုံးအနေနဲ့ ထွက်ခွာပေးဖို့ စစ်ကောင်စီတပ်က ပြောထားတယ်။ မနေ့ကတည်းက တချို့ ထွက်ပြေးတိမ်းရှောင်သွားကြပြီ။ ရွာခံတွေ အားလုံး တောဘက်ကို ထွက်ပြေးတိမ်းကုန်ပြီ။ ကလေး နှစ်ယောက်လည်း ပျောက်နေတယ်” လို့ ဒေသခံ တယောက်က  ပြောပါတယ်။ 

လုံရှာယန်က ရွာကြီးဖြစ်ပြီး ရွာသေးလေးတွေအပါအဝင် ကျေးရွာအုပ်စု ၁၀ ကျော်၊ အိမ်ခြေ ၈၀၀ နဲ့ ၁၀၀၀ ကြားရှိပြီး လူဉီးရေ ၃၀၀၀ နဲ့ အထက်ရှိကာ ကချင်၊ ခနုန်၊ လီဆူ၊ ရှမ်း၊ ရဝမ် လူမျိုးတွေ စုပေါင်းနေထိုင်ကြတာပါ။

လက်ရှိမှာတော့ ဒေသခံ ၅၀၀၀ ဝန်းကျင် ရွာအနီးနား တောထဲထွက်ပြေးကြရပြီး ပူတာအိုနဲ့ မြစ်ကြီးနားဘက် တိမ်းရှောင်နေကြရသူတွေလည်း ရှိတယ်လို့ ဒေသခံက ပြောပါတယ်။ 

စစ်ရှောင်ပြည်သူတွေကို လာကြိုတဲ့ ပူတာအိုက ဘာသာရေးအသင်းအဖွဲ့ရဲ့ ကားတွေကို စစ်ကောင်စီက လူနာတွေတင်ဖို့ ချောဆွဲထားတယ်လို့ ဆိုပါတယ်။  

PDF တပ်ဖွဲ့ဝင်တဦးက “ပူတာအိုလမ်းဘက်တော့ အကုန်ခြောက်ကပ်သွားပြီ။ ခုညနေ ၃ နာရီကျော်ခန့်ကစ တိုက်ပွဲ ပြန်ဖြစ်နေပြီ။ ရှိန်းဂတ်တောင် သွားလမ်း၊ လုံဂါယန် ဆိုတဲ့နေရာ။ ပူတာအိုခရိုင်ကနေ ထိုးစစ်ဆင်လာတဲ့ စစ်ကောင်စီ အင်အားဖြည့်ကား ၃ စီးကို KIA နဲ့ PDF ပူးပေါင်းတပ်ဖွဲ့တွေ။ ဖေဖော်ဝါရီ ၁၈ ရက်နေ့ကစတာ ဒီနေ့ ၂၃ ရက်နေ့အထိ၊ မနေ့ကတော့ သူတို့ လေယာဉ် ၂ စီး နဲ့ ၃ ကြိမ်လာပစ်တယ်။ မနေ့ကလည်း ပစ်တယ်၊ ဒီနေ့လည်း ပစ်တယ်။ ရှိန်းဂတ်တောင်ကို ကျနော်တို့ ဝိုင်းထားဆဲ။ တပ်က ခလရ ၁၃၇, ၇၈၆ ပူးပေါင်းတပ်တွေ။ ကျနော်တို့ဘက်က တပ်မဟာ ၁ အောက် တပ်ရင်း ၇ နဲ့ PDF တွေ။ ခုအားလုံး ရှိန်းဂတ်တောင်ဘက် တက်လာနေတယ်။ အင်အား ၂၀၀ ကျော်၊ စစ်မျက်နှာ ၃ ဘက်ကနေ။ မနက်ဖြန်လောက်တော့ အကြီးအကျယ် ဖြစ်လာတော့မှာ။” 

စစ်ကောင်စီအနေနဲ့ ရှိန်းဂတ်တောင်ကို ၂၀၁၇ နှစ်က ဆုံးရှုံးလိုက်ရပြီးချိန်ကစ လုံရှာယန်ဘက် အခြေချကာ ဆွမ်ပီယန်နဲ့ ရှိန်းဂတ်တောင်ကြား ဆွမ်ပီယန်၊ ဆွမ်ပရာဘွမ်လမ်းမကြီး ဘယ်ညာ ဘိန်းခြံ စီမံကိန်းအကြီးကြီးတွေလုပ်လာပြီး ဘိန်းဖြူ၊ ဘိန်းမည်း၊ ရာဘ စတဲ့ မူးယစ်ဆေးဝါးတွေ ထုတ်လုပ်ကာ ပြည်သူတွေကို ဖျက်ဆီးနေတာကြောင့် KIA, PDF ပူးပေါင်း ရှင်းလင်းနေပြီး မရမနေ ပြန်ယူနေတာလို့ ဆိုပါတယ်။