ဘယ်လ်ဂျီယံနိုင်ငံ ဘရပ်ဆဲလ်မြို့မှာ နေထိုင်တဲ့ ယူကရိန်းလူမျိုးတွေက နေတိုးအဖွဲ့ဌာနချုပ်ရှေ့မှာ ဖေဖာ်ဝါရီ ၂၅ ရက်က ရုရှားကျူးကျော်မှုကို အကာကွယ်အမြန်ဆုံးပေးဖို့ ဒေါသသံတွေနဲ့ ဆန္ဒပြခဲ့ကြတာပါ။ 

ယူကရိန်းမြို့တော် ကိယက်ဗ်ပေါ်ကို ရုရှားမစ်ဇိုင်းဒုံးကျည်တွေ တဝုန်းဝုန်း ကျရောက်နေခိုက်မှာ နေတိုးအဖွဲ့ အတွင်းရေးမှူးချုပ် ယန်းစတိုတန်ဘဂ်နဲ့ အဖွဲ့ဝင်နိုင်ငံခေါင်းဆောင်တချို့ အစည်းဝေးလုပ်နေပါတယ်။  အဲဒီအချိန်မှာ ဆန္ဒပြသူတွေက နေတိုးတပ်တွေ ဝင်ရောက်ကူညီဖို့ ဆန္ဒပြခဲ့တာပါ။ 

ဆန္ဒပြသူတဦးက “လွန်ခဲ့တဲ့ ၈ နှစ်ကတည်းက ယူကရိန်းကို နေတိုးအဖွဲ့  ပြတ်ပြတ်သားသား အကူညီပေးဖို့ တောင်းဆိုလာတာပါ။ သူတို့ ကူညီတာ အားနည်းလွန်းပါတယ်။ သတိထားလွန်းတယ်။ အခုက စောင့်ကြည့်နေရမယ့် အချိန်မဟုတ်ဘူး”လို့ ပြောပါတယ်။

နောက်တဦးကလည်း နေတိုးနဲ့ ကုလသမဂ္ဂက No-fly zone လုပ်ပြီး ကူညီဖို့ ပြောပါတယ်။ ကြာသာပတေးနေ့ကစပြီး ရုရှားက ယူကရိန်းရဲ့ အရှေ့၊ တောင်နဲ့ မြောက် သုံးဘက်ကနေ စစ်ဆင်ခဲ့တာပါ။