မကွေးတိုင်း၊ ဂန့်ဂေါမြို့နယ်၊ ရွှေဘိုကျေးရွာကို  စစ်ကောင်စီတပ်က  ဖေဖော်ဝါရီ ၂၈ ရက် ဒီမနက်မှာဝင်ရောက်ပြီး  ပြည်သူတွေရဲ့နေအိမ်တွေကို မီးရှို့ဖျက်ဆီးသွားတယ်လို့ ဒေသခံရွာသားတွေက ပြောပါတယ်။ 

မြောက်ခင်ရန်းကျေးရွာမှာတပ်စွဲထားတဲ့ စစ်ကောင်စီတပ်သားတွေ၊  တောင်ခင်ရန်းရဲစခန်းမှ ရဲတွေနဲ့ ပျူစောထီးတွေပူးပေါင်းပြီး ကျေးရွာတွင်းစစ်ကြောင်းထိုးဝင်ရောက်လာကာ နေအိမ်အများ အပြားကို မီးရှို့ဖျက်ဆီးသွားတာလို့ လည်းပြောပါတယ်။

ဒါ့အပြင် ရွှေဘိုရွာအနောက်ဘက်ရှိ ရေသာရွာမှာလည်း  နေအိမ် ၅ လုံးကို စစ်တပ်က မီးရှို့ဖျက်ဆီးသွားခဲ့တယ်လို့ သိရပါတယ်။ 

လက်ရှိမှာတော့ စစ်ကောက်စီတပ်တွေရရဲ့ အကြမ်းဖက်မှုကြောင့်  ရွှေဘိုကျေးရွာနဲ့ ရေသာကျေးရွာအနီးက ပြည်သူတွေ ဘေးလွတ်ရာ ထွက်ပြေးတိမ်းရှောင်နေကြရပါတယ်။

ဒီနေ့မနက် သာဝတီရဲစခန်းမှာ တပ်စွဲထားတဲ့ စစ်ကောင်စီတပ်သားတွေဟာ ရေရှင်ကျေးရွာနဲ့ တင်သားကျေးရွာဘက်ကိုလည်း   လက်နက်ကြီးတွေနဲ့ ပစ်ခတ်တိုက်ခိုက်ခဲ့တယ်လို့ ဒေသခံ ရွာသားတွေက ပြောပါတယ်။ 

ဆက်လက်ပြီး  ဂန့်ဂေါနယ်မှာ စစ်ရေးတင်းမာနေတဲ့အတွက်  ကလေး-ဂန့်ဂေါလမ်းကို ‌ဒေသခံပြည်သူတွေ အသွားအလာမပြုလုပ်ကြဖို့ ယော PDF တပ်ဖွဲ့က ထုတ်ပြန်သတိပေးထားပါတယ်။

လတ်တလော စစ်ကိုင်းတိုင်းနဲ့ မကွေးတိုင်းအတွင်းက ကျေးရွာတွေကို စစ်ကောင်စီတပ်တွေက တရာဝင် တရွာထွက် ဝင်ရောက်ပြီး PDF နှိမ်နင်းရေး ခေါင်းစဉ်တပ်ကာ  ပြည်သူတွေပိုင်ဆိုင်တဲ့ အိုးအိမ်တွေကို အကြမ်းဖက် မီးရှို့ဖျက်ဆီးနေတာ ဖြစ်ပါတယ်။