မန္တလေးတွင် ဗကသကျောင်းသူအပါအဝင် ၃ ဦးကို စစ်တပ်က ဖမ်းဆီး၊ ဓာတ်ပုံရိုက်သူကို ပစ်သတ်
2
မန္တလေး၊ အမရပူရမြို့နယ်၊ မှန်တန်းရပ်ကွက်၊ နန်းတော်ရာစံပြကွက်သစ်မှာ မတ်လ ၂ ရက် ညနေပိုင်းက မန္တလေး ပညာရေးဒီဂရီကောလိပ် ကျောင်းသားများသမဂ္ဂ (ဗကသ) ဥက္ကဋ္ဌ အပါအဝင် ၃ ဦးကို စစ်ကောင်စီက ဖမ်းဆီးသွားပါတယ်။
ဖမ်းဆီးခံရသူတွေဟာ မန္တလေး ပညာရေးဒီဂရီကောလိပ် ကျောင်းသားများသမဂ္ဂ (ဗကသ) ဥက္ကဋ္ဌ မသိရိရတနာ၊ မန္တလေး ပညာရေးဒီဂရီကောလိပ် ကျောင်းသားများသမဂ္ဂ (ဗကသ) အတွင်းရေးမှူး ကိုအောင်မျိုးကိုနဲ့ CDM ကျောင်းဆရာ ကိုကျော်ဇင်လတ်တို့ ဖြစ်ပါတယ်။
ဒီလိုဖမ်းဆီးခံရတာနဲ့ ပတ်သက်လို့ မန္တလေး ပညာရေးဒီဂရီကောလိပ် ကျောင်းသားများသမဂ္ဂ (ဗကသ) တာဝန်ရှိသူ တစ်ဦးကလည်း အတည်ပြုပါတယ်။
ဒါ့အပြင် ဖမ်းဆီးနေတဲ့အချိန်မှာ ဓာတ်ပုံရိုက်တဲ့ အမျိုးသားတယောက်ကိုလည်း စစ်ကောင်စီတပ်သားတွေက သေနတ်နဲ့ ပစ်သတ်ခဲ့လို့ နေရာမှာတင်သေဆုံးသွားတယ်လို့ သိရပါတယ်။
