ကရင်ပြည်နယ်၊ မြဝတီမြို့တောင်ဘက်၊ လေးကေ့ကော်ဒေသ ဖလူးကြီးရွာအနီးမှာ မတ်လ ၄ နေ့က စစ်ကောင်စီတပ်ဖွဲ့ဝင် ၂ ယောက်  မိုင်းနင်းမိပြီး ခြေထောက်မှာ ဒဏ်ရာ အပြင်းအထန်ရရှိသွားတယ်။

အဆိုပါ စစ်ကောင်စီတပ်ဖွဲ့ဟာ လေးကေ့ကော်မြို့သစ်နဲ့ ဖလူးကြီး ဖလူးလေးဘက်မှာ နေ့စဉ် ကင်းလှည့်နေတဲ့တပ်ဖွဲ့ဖြစ်ပြီး  စကခ (၁၂)လက်အောက်ခံ ခလရ  ၂၃၁ က တပ်ဖွဲ့ဝင်တွေဖြစ်တယ်လို့ KNLA တာဝန်ရှိသူ တစ်ဦးကပြောပါတယ်။  

စစ်ကောင်စီတဖွဲ့လှည့်ကင်းလှည့်နေချိန်  KNLA  ဘက်က ဖလူးကြီးရွာအထွက်နားမှာ  မြေမြှုပ်မိုင်းထောင်ထားအပြီး မိနစ် ၃၀ လောက်အကြာမှာ ပေါက်ကွဲသံကြားခဲ့ရတာလို့ ဆိုပါတယ်။

မိုင်းနင်းမိတဲ့ စစ်ကောင်စီတပ်ဖွဲ့ဝင် ၂ ယောက်ကို  မြဝတီမြို့ သင်္ဃန်းညီနောင် စစ်ဆေးရုံကို ပို့ဆောင် ဆေးကုသပေးနေပါတယ်။ 

လေးကေ့ကော်မြို့သစ်ကို စစ်ကောင်စီတပ်တွေက ကျူးကျော်ဝင်ရောက်လာတာကြောင့်  ပြီးခဲ့တဲ့နှစ် ဒီဇင်ဘာ ၁၅ ရက်မှာ တိုက်ပွဲပြင်းထန်စတင်ဖြစ်ပွားခဲ့ပြီး ဒေသခံတွေ ထောင်သောင်းချီ ထိုင်းနိုင်ငံဘက် ထွက်ပြေးခဲ့ကြရတာဖြစ်ပါတယ်။

မတ်လ ၂ ရက်ကလည်း တိုက်ပွဲဖြစ်ပွားပြီး စစ်ကောင်စီဘက်က တပ်သား  ၁၀ ယောက်လောက် သေဆုံးကာ တချို့ ဒဏ်ရာရခဲ့ကာ  မတ်လ ၃ ရက် မနေ့ကလည်း  တိုက်ပွဲအနည်းငယ်ဖြစ်ပွားခဲ့ပါတယ်။