အီရန်နဲ့ ကမ္ဘာ့အင်အားကြီးနိုင်ငံတွေအကြား သဘောတူထားခဲ့ဖူးတဲ့ ၂၀၁၅ အီရန် နျူကလီးယား သဘောတူညီချက် ပြန်အသက်သွင်းရေး ပြီးပြတ်ဖို့လိုနေတဲ့ ကိစ္စတချို့ ကျန်နေသေးတယ်လို့ အီရန် နျူကလီးယား ဆွေးနွေးပွဲတွေအတွက် ရုရှားသံတမန် မီခေးလ် အူရီယာနာ့ဗ်က မတ် ၃ ရက်မှာ ပြောလိုက်ပါတယ်။

ဝန်ကြီးအဆင့် အစည်းအဝေးတွေ ဖြစ်လာဖို့ ရှိပေမယ့် သီတင်းပတ်ကုန်ရက်မှာ ဖြစ်မလား၊ တနင်္လာနေ့မှာ ဖြစ်မလား ဆိုတာကိုတော့ မပြောနိုင်သေးဘူးလို့ သူက သတင်းထောက်တွေကို ပြောပါတယ်။

ဆွေးနွေးပွဲတွေက နောက်ဆုံးအဆင့်ကို ရောက်နေပေမယ့် ပြီးပြတ်တဲ့အဆင့် မရောက်သေးတာတော့ သေချာတယ်လို့ ဥရောပသမဂ္ဂဆိုင်ရာ ဆွေးနွေးပွဲ ညှိုနှိုင်းရေးမှူး အန်ဒရစ် မိုရာက တွစ်တာ လူမှုကွန်ရက်ပေါ်ကနေ ပြောပါတယ်။

ရှုပ်ထွေးတဲ့ ညှိနှိုင်းရေးဖြစ်လို့ အောင်မြင်မယ်လို့ အာမမခံနိုင်သေးဘူး၊ ညှိနှိုင်းရေးအဖွဲ့ထဲမှာ အစွမ်းကုန် ကြိုးစားနေတယ်လို့လည်း သူက ပြောခဲ့ပါတယ်။

ခုတကြိမ် သဘောတူညီချက်ရဲ့ နာမည်ကိုတော့ ပူးတွဲလုပ်ဆောင်မှု ဘက်စုံစီမံချက်လို့ သုံးနှုန်းမှည့်ခေါ်ထားပါတယ်။