မွန်ပြည်နယ်၊ ကျိုက်ထိုမြို့နယ်၊ အင်္ဂဘိုနဲ့ မရမ်းချောင်းကျေးရွာကြားမှာ မတ် ၉ ရက်နေ့ မနက် ၁၀ နာရီခွဲလောက်က စစ်ကောင်စီတပ်နဲ့ KNLA ပူးပေါင်းတပ်ဖွဲ့တို့ တိုက်ပွဲဖြစ်ပွားခဲ့တယ်လို့ KNU တာဝန်ရှိသူတဦးက ဒီဗွီဘီကို ပြောပါတယ်။
လုံခြုံရေးယူပြီး စစ်ကြောင်းလှုပ်ရှားလာတဲ့ စစ်ကောင်စီတပ်ကို ကရင်အမျိုးသားလွတ်မြောက်ရေးတပ်မတော် (KNLA) နဲ့ ဒေသ PDF ပူးပေါင်းအဖွဲ့က သွားရောက်တိုက်ခိုက်ရာမှ နှစ်ဖက် ထိတွေ့ တိုက်ပွဲဖြစ်ပွားခဲ့တာပါ။
နာရီဝက်ကျော်တဲ့ အဲဒီတိုက်ပွဲအတွင်း စစ်ကောင်စီဘက်က ၅ ဦး သေဆုံးပြီး ၇ ဦး ထိခိုက်ဒဏ်ရာရရှိခဲ့သလို KNLA ဘက်ကလည်း ၁ ဦး ထိခိုက်ဒဏ်ရာရရှိခဲ့တယ်လို့ KNU တပ်မဟာ (၁) သထုံခရိုင် တာဝန်ရှိသူ တစ်ဦးက ပြောပါတယ်။
အဲဒီတိုက်ပွဲအတွင်း ရန်ကုန်-မော်လမြိုင်ကားလမ်း ၂ နာရီနီးပါးအကြာ ပိတ်ဆို့မှုဖြစ်ပေါ်ခဲ့သလို ခရီးသွား ဟိုက်ဂျက်ကား ၁ စီး ကျဉ်ထိမှန်ခဲ့ပါတယ်။
KNU တပ်မဟာ (၁) ထိန်းချုပ်နယ်မြေဖြစ်တဲ့ ကျိုက်ထိုမြို့နယ်မှာတော့ စစ်ကောင်စီတပ်နဲ့ KNLA၊ PDF ပူးပေါင်းတပ်ဖွဲ့တို့ကြား မကြာခဏဆိုသလို တိုက်ပွဲတွေ ဖြစ်ပွားနေပြီး ထွက်ပြေးတိမ်းရှောင်နေရတဲ့ စစ်ရှောင်ပြည်သူ ၂,၀၀၀ နီးပါး ရှိနေတာပါ။