ထိုင်းနိုင်ငံထဲကို တရားမဝင် နယ်စပ်ဖြတ်ကျော်ဝင်ရောက်လာတဲ့ မြန်မာနိုင်ငံသား ၁၅ ယောက်ပါ ကားတစီးကို ကင်းလှည့်တပ်ဖွဲ့က တားဆီးချိန်မှာ ရပ်မပေးပဲ မောင်းပြေးတာကြောင့် လိုက်လံဖမ်းဆီးခဲ့ရတယ်လို့ ဘန်ကောက်ပို့စ်သတင်းမှာ ဖော်ပြပါတယ်။

ဆွိုင်ယော့ခ်ခရိုင်ထဲမှာ မတ် ၂၆ ရက်က ဖြစ်ခဲ့တာဖြစ်ပြီး ကြိုတင်သတင်းပေးချက်အရ ထိုင်းရဲတပ်ဖွဲ့က အဆိုပါကားကို တားဆီးချိန်မှာ ရပ်မပေးဘဲ အရှိန်မြှင့် မောင်းပြေးခဲ့တာလို့ ဆိုပါတယ်။ အဲဒီနောက်မှာတော့ ရဲကားတွေက လိုက်ခဲ့ချိန် လမ်းတနေရာမှာ အဆိုပါကားဟာ လမ်းဘေး ဓာတ်တိုင်ကို ဝင်တိုက်မိခဲ့ပြီးနောက် ဖမ်းဆီးနိုင်ခဲ့တယ်လို့ ဆိုပါတယ်။

ကားထဲမှာတော့ မြန်မာအမျိုးသား ၁၂ ယောက်နဲ့ အမျိုးသမီး ၃ ယောက်ပါဝင်ပြီး အသက် ၂၈ နှစ်အရွယ် ထိုင်းယာဉ်မောင်းအမျိုးသားတယောက်ကိုပါ ရဲတပ်ဖွဲ့က ဖမ်းဆီးနိုင်ခဲ့တာပါ။

စစ်ဆေးမေးမြန်းချိန်မှာတော့ အဆိုပါ အမျိုးသားက သူ့ကို ဂေါ့ဖ်လို့ခေါ်တဲ့ အမျိုးသားတယောက်က ဘတ် ၅ ထောင်နဲ့ မောင်းပို့ပေးဖို့ ခိုင်းခဲ့တာလို့ ဖြေခဲ့ပါတယ်။

မြန်မာတွေကို မေးမြန်းချိန်မှာတော့ သူတို့ဟာ ထိုင်းနယ်စပ်တောလမ်းကနေ ဖြတ်ကျော်ဝင်ရောက်လာခဲ့ကြပြီး ထိုင်းနိုင်ငံထဲက အလုပ်နေရာဆီရောက်ဖို့ တယောက်ကို ပွဲစားခဘတ် ၂၉,၀၀၀ ကနေ ၃၀,၀၀၀ စီအထိ ပေးခဲ့ကြရတယ်လို့ ပြောပါတယ်။

လတ်တလောမှာတော့ သူတို့ကို ဉပဒေအရ လိုအပ်တဲ့ စစ်ဆေးမေးမြန်းမှုတွေ လုပ်ဆောင်နေပြီး နေရပ်ပြန်ပို့နိုင်ဖို့ ဆက်လက်လုပ်ဆောင်သွားမယ်လို့ ဆိုပါတယ်။