ထိုင်းနိုင်ငံ၊ မဲဆောက်မြို့မှာ  တရားမဝင် Call Center ဖွင့်ပြီး အွန်လိုင်း လောင်းကစားတဲ့ တရုတ်နဲ့ ထိုင်းနိုင်ငံသားတချို့ကို မတ်လ ၂၉ ရက် ဒီနေ့ မွန်းလွဲပိုင်းမှာ  ထိုင်းအာဏာပိုင်တွေက ဖမ်းဆီးအရေးယူလိုက်တယ်လို့  AEC ထိုင်းသတင်းမှာ ဖော်ပြပါတယ်။  

မြန်မာ-ထိုင်းချစ်ကြည်ရေး တံတားအမှတ်(၁) ရေလယ်ကျွန်းမှာ  ဒီနေ့ မွန်းလွဲ ၁ နာရီလောက်က  ၄ ယောက်ဖမ်းမိပြီး  မဲဆောက်မြို့တည်းခိုခန်းမှာ နောက်ထပ် ၉ ယောက်ကို ထိုင်းအာဏာပိုင်တွေက ဖမ်းဆီးခဲ့တာဖြစ်ပါတယ်။

တာခ်ခရိုင်အုပ်ချုပ်ရေးမှူးရဲ့ညွှန်ကြားချက်နဲ့ နယ်စပ်သွားလာသူတွေကိုစစ်ဆေး တင်းကျပ် ကင်းလှည့်နေစဉ် မဲဆောက် ကမ်းနားဈေးအနီး မြန်မာဘက်ရေလယ်ကျွန်းဘက်ကနေ ပြန်လာတဲ့ အသက် ၁၈ နဲ့ ၂၀ အကြား  ထိုင်းအမျိုးသမီးငယ် ၃ ဦးနဲ့ ‌ထိုင်းအမျိုးသား ၁ ဦး ကိုစစ်မေးရာမှာ  ရေလယ်ကျွန်းဘက်ကို ထွက်ပြေးတဲ့အတွက် သက်ဆိုင်ရာ မြန်မာဘက်ကမ်းတာဝန်ရှိသူတွေရဲ့ အကူအညီနဲ့ ပြန်လည်ဖမ်း ဆီးနိုင်ခဲ့ပါတယ်။

တချိန်တည်းမှာဘဲ မဲဆောက်မြို့တည်းခိုခန်းတစ်နေရာကို ဝင်ရောက်စစ်ဆေးတော့ အွန်လိုင်း Call Center  လောင်းကစားလုပ်တဲ့ တရုတ်နိုင်ငံသား ၂ ယောက်၊ စကားပြန်ထိုင်း ၁ ယောက်နဲ့ တခြားထိုင်းနိုင်ငံသား ၆ ယောက် စုစုပေါင်း ၉ ယောက်ကိုလည်း ထိုင်းရဲက ထပ်မံ ဖမ်းဆီးရမိခဲ့ပါတယ်။ 

ထိုင်းနိုင်ငံသား အမျိုးသား အမျိုးသမီးတွေဟာ ပွဲစားကနေတဆင့် အလုပ်ကောင်း လစာကောင်းကြောင်း မြှူဆွယ်  အလိမ်ခံရပြီး မြန်မာ-ထိုင်းနယ်စပ် မြဝတီမြို့ ဘက်မှာနေတဲ့ တရုတ်နိုင်ငံသား လောင်းကစားသမားတွေရဲ့ ခိုင်းစေခံခဲ့ရတာဖြစ်ပါတယ်။ 

ဒါကြောင့် ထိုင်းလူငယ်တွေ တရုတ်လက်အောက်မရောက်စေရေးအတွက် ထိုင်းနိုင်ငံနယ်စပ် တာဝန်ကျ ရဲတပ်ဖွဲ့၊ ထိုင်းစစ်တပ်နဲ့ ဌာနဆိုင်ရာတို့က ပူးပေါင်းဖမ်းဆီး ဆောင်ရွက်နေတယ်လို့ သိရပါတယ်။

ဖမ်းဆီးရမိတဲ့ အဆိုပါ ထိုင်းနဲ့ တရုတ်ကိုတော့ မဲဆောက်မြို့ပိုင်ရုံးမှာ စစ်ဆေးနေပြီး ထိုင်းနိုင်ငံရဲ့ တရားဥပဒေအတိုင်း အရေးယူသွားဖို့ ရှိနေပါတယ်။