ပေါက်မြို့နယ်တိုက်ပွဲတွင် ရဲနှင့် ပျူစောထီး ၄ ဦးခန့်သေ၊ ၆ ဦးခန့်ဒဏ်ရာရ
မကွေးတိုင်း ပေါက်မြို့နယ်မှာ ဧပြီ ၂ ရက် ညနေက ရဲနဲ့ ပျူစောထီး အင်အား ၃၀လောက်နဲ့ ပြည်သူ့ကာကွယ်ရေးတပ် SPPDF တို့ တိုက်ပွဲဖြစ်ပွားခဲ့လို့ ရဲနဲ့ ပျူစောထီး ၄ ယောက်သေဆုံးကာ ၆ ယောက်လောက်ဒဏ်ရာရရှိသွားတယ်လို့ ပေါက်မြို့နယ်တောင်ပိုင်း SPPDF က ဒီကနေ့ ထုတ်ပြန်ပါတယ်။
ပေါက်မြို့နယ် ထန်းတောလယ်ရွာနဲ့ စမ်းရေခုံရွာကြားမှာ ဧပြီလ ၂ ရက် ညနေ ၃ နာရီလောက်က ကိုင်းလယ်ရဲစခန်းကရဲတွေနဲ့ ပျူစောထီးအင်အား ၃၀လောက်ကို SPPDF ကမိုင်းဆွဲတိုက်ခိုက်ခဲ့ရာက နှစ်ဘက်တိုက်ပွဲ ဖြစ်ပွားကာ ရဲနဲ့ပျူစောထီး ၄ ယောက်သေဆုံး ၆ ယောက်ဒဏ်ရာရရှိသွားတယ်လို့ SPPDF ရဲ့ ပြန်ကြားရေးတာဝန်ခံက ပြောပါတယ်။
“အဲဒီတိုက်ပွဲအတွင်းမှာ ကျနော်တို့ SPPDF တပ်ရင်း(၂) တပ်ခွဲ(၁)ဘက်ကစပြီး မိုင်းဆွဲတိုက်ခိုက်တာဗျ။ လက်နက်ကြီးတွေနဲ့ လည်း ၁၂ ချက်လောက်ပစ်ခတ်တိုက်ခိုက်ခဲ့တယ်။ သူတိုဘက်ကပြန်ပစ်ပေမဲ့ ကျနော်တို့ ရဲဘော်တွေထိခိုက်မှုမရှိဘူး။”
ထန်းလယ်တောရွာနဲ့ စမ်ရေခုံရွာကြားမှာ တိုက်ပွဲဖြစ်ပြီး လက်နက်ကြီး သံတွေ အချက် ၂၀ လောက်ကြားရကြောင်းနဲ့ တိုက်ပွဲကြောင့် ကျေးရွာ ၂ ရွာက ဒေသခံပြည်သူ ၈၀၀ ကျော်လောက် ဘေးလွတ်ရနေရာတွေမှာ ထွက်ပြေးတိမ်းရှောင် ပုန်းအောင်းနေရတယ်လို့ စမ်းရေခုံ ရွာသားတစ်ယောက်ကလည်း ပြောပါတယ်။
ပေါက်မြို့နယ် အင်းငယ်ထောင့်ရွာမှာ မတ်လ ၅ ရက်ကလည်း ကိုင်းလယ်ရဲစခန်းကရဲတွေနဲ့ ပျူစောထီးတွေ ပေါင်းပြီး ဒေသခံအမျိုးသမီးတစ်ယောက်ကို အဓမ္မပြုကျင့်သတ်ဖြတ်ကာ ၃ နှစ်အရွယ် သမီးဖြစ်သူကိုပါ သေနတ်နဲ့ပစ်သတ်သွား နေအိမ် ၆ လုံးကိုလည်း မီးရှို့ ဖျက်ဆီးသွားပါတယ်။
နှစ်ဘက်တိုက်ပွဲတွေနဲ့ ပတ်သက်လို့တော့ ထိခိုက်သေဆုံးတဲ့ အခြေနေကိုတော့ စစ်ကောင်စီဘက်က သတင်းထုတ်ပြန်ထားတာမတွေ့ရသေးပါဘူး။
