မကွေးတိုင်း၊ ပေါက်မြို့နယ်မှာ ဧပြီ ၁၁ ရက် ညနေပိုင်းက ဒေသကာကွယ်ရေး မဟာမိတ်တပ်တွေနဲ့ စစ်ကောင်စီတပ်တွေ တိုက်ပွဲဖြစ်ပွားရာ စစ်ကောင်စီဘက်က ၁၀ ယောက်ထက်မနည်း သေဆုံးခဲ့တယ်လို့  ပေါက်တောင်ပိုင်း ပြောက်ကျားတပ်ဖွဲ့ကနေ သိရပါတယ်။

ပေါက်မြို့နယ်တောင်ပိုင်း ကျောက်အိုးကုန်း ရွာဘက်ကို ထိုးစစ်ဆင်လာတဲ့ စစ်ကောင်စီ တပ်သားတွေကို ဒေသကာကွယ်ရေး ညီနောင်မဟာမိတ်တပ်ဖွဲ့တွေက ပူးပေါင်းတိုက်ခိုက်ခဲ့တာလို့ SPGF တပ်ဖွဲ့ တာဝန်ရှိသူက ပြောပါတယ်။

“ကျနော်တို့ဘက်က ၄၀ မမတွေနဲ့ ပစ်ခတ်တိုက်ခိုက်ခဲ့သလို စနိုက်ပါလက်ချက်နဲ့ စစ်ကောင်စီတပ်သား ၁၀ ယောက်ထက်မနည်း သေဆုံးကာ အများအပြား ဒဏ်ရာရရှိသွားကြတယ်။”

အဲဒီတိုက်ပွဲကို ပေါက်တောင်ပိုင်းပြောက်ကျားတပ်ဖွဲ့ SPGF၊ CDF- ကန်ပက်လက်၊ CDF-မင်းတပ်၊ PDF-ကျောက်ထု၊ PDF-ဆော၊ YDF နဲ့ PPC တို့က ပူးပေါက်တိုက်ခိုက်ခဲ့တာဖြစ်ပါတယ်။ 

တိုက်ပွဲတွင်းမှာ ညီနောင်မဟာမိတ်တပ်ဖွဲ့တွေဘက်က ထိခိုက်ကျဆုံးမှုမရှိဘဲ ဆုတ်ခွာနိုင်ခဲ့ပေမဲ့ စစ်ကောင်စီတပ်သားတွေဟာ  တရွာဝင်တရွာထွက် ဒေသခံပြည်သူတွေရဲ့နေအိမ်တွေကို မီးရှို့ ဖျက်ဆီးခဲ့ကြတယ်လို့ ဒေသခံက  ပြောပါတယ်။

စစ်ကောင်စီတပ်သားတွေဟာ မနေ့က တရက်တည်းမှာ ပေါက်မြို့နယ်ထဲက တောင်ချို၊ ဘို့မယ်၊ အင်းငယ်ထောင့်၊ ကျောက်အိုးကုန်းကျေးရွာတွေနဲ့ ဆိပ်ဖြူမြို့နယ်ထဲက ရှားလှကျေးရွာကို မီးရှို့ဖျက်ဆီးခဲ့လို့ ဒေသခံပြည်သူတွေရဲ့ နေအိမ်အများအပြား မီးလောင်ဆုံးရှုံးခဲ့ရကာ ပြည်သူ ၁၀၀၀၀ ကျော် ဘေးလွတ်ရာကို ထွက်ပြေးနေကြရတယ်လို့ ဒေသခံတယောက်က ပြောပါတယ်။

အဆိုပါတိုက်ပွဲနဲ့ ပတ်သက်လို့တော့ ထိခိုက်သေဆုံးတဲ့ အခြေအနေကို စစ်ကောင်စီဘက်က သတင်းထုတ်ပြန်ထားတာ မတွေ့ရသေးပါဘူး။