ယူကရိန်းအရေးကို အသုံးချပြီး တရုတ်နိုင်ငံအပေါ် ခြိမ်းခြောက် ဖိအားပေးတာမျိုး ရှောင်ကြဉ်ဖို့ တရုတ်ကာကွယ်ရေးဝန်ကြီး ဗိုလ်ချုပ် ဝေဖှုန့်ဟော့က အမေရိကန်ကို တိုက်တွန်းလိုက်ပါတယ်။

တရုတ်နိုင်ငံတော် ကောင်စီဝင်နဲ့ ကာကွယ်ရေးဝန်ကြီး ဗိုလ်ချုပ် ဝေဖှုန့်ဟော့ဟာ အမေရိကန် ကာကွယ်ရေးဝန်ကြီး လွိုဒ် အော်စတင်နဲ့ ဧပြီ ၂၀ ရက်က ဖုန်းဆက်ပြီး အပြန်အလှန် ဆက်ဆံရေး ဆွေးနွေးခဲ့စဉ် အဲဒီလို ပြောဆိုလိုက်တာပါ။

တရုတ်ရဲ့စနစ်ကို ပြောင်းလဲဖို့ ဒါမှမဟုတ် စစ်အေးတိုက်ပွဲအသစ် ဖန်တီးဖို့ ရည်ရွယ်ချက် မရှိဘူးဆိုတဲ့ ကတိကို အမေရိကန်ဘက်က ဖြည့်ဆည်းဖို့၊ ထိပ်တိုက်တွေ့တာမျိုးကို ရှောင်ဖို့၊ ငြိမ်းငြိမ်းချမ်းချမ်း အတူလက်တွဲ နေထိုင်ဖို့၊ အပြန်အလှန် လေးစားဖို့၊ နှစ်နိုင်ငံခေါင်းဆောင်တွေကြား သဘောတူညီချက်ကို အမေရိကန်ဘက်က စိတ်အားထက်ထက်သန်သန် အကောင်အထည် ဖော်သင့်တယ်လို့ ဝေဖှုန့်ဟော့က ပြောပါတယ်။

တရုတ်ဟာ အမေရိကန်နဲ့ အားကောင်း ယုံကြည်ရလောက်ပြီး တည်ငြိမ်တဲ့ ဆက်ဆံရေးကို ရဖို့ မျှော်လင့်တယ်၊ တရုတ်ရဲ့ ပိုင်းဖြတ်ချက်နဲ့ စွမ်းရည်ကို လျှော့မတွက်သင့်ဘူးလို့လည်း သူက ပြောပါတယ်။

၂ နိုင်ငံစစ်တပ်တွေဟာ အပြန်အလှန် ယုံကြည်မှု တိုးမြှင့်ပြီး ဆွေးနွေးဖလှယ်တာတွေ အားဖြည့်သင့်တယ်၊ အကျပ်အတည်းတွေနဲ့ ဘေးအန္တရာယ်တွေကို စီမံခန့်ခွဲရင်း လက်တွေ့ကျကျ ပူးပေါင်းဆောင်ရွက်သင့်တယ်၊ ဒါမှ စစ်တပ်ချင်းကြား ဆက်ဆံရေးက ပုံမှန် တည်ငြိမ်တိုးတက်တာ သေချာမယ်လို့လည်း ဝေက ပြောပါတယ်။

ထိုင်ဝမ်ဟာ တရုတ်နဲ့ မခွဲခွာနိုင်တဲ့ အစိတ်အပိုင်းဖြစ်ပြီး ဒီအခြေအနေကို ဘယ်သူမှ အပြောင်းအလဲ မလုပ်နိုင်ဘူးလို့လည်း ဝေက ပြောပါတယ်။

အမေရိကန် ကာကွယ်ရေးဝန်ကြီး အော်စတင်ကတော့ အမေရိကန်ဟာ ၂ နိုင်ငံခေါင်းဆောင်တွေ သဘောတူထားတဲ့ အရေးကြီးတဲ့ လုပ်ငန်းစဉ်တွေကို အကောင်အထည်ဖော်ဖို့ အသင့်ပဲ၊ ပွင့်လင်းမြင်သာတဲ့နည်းနဲ့ စစ်ဘက်ဖလှယ်ရေးနဲ့ ပူးပေါင်းဆောင်ရွက်ရေး အားဖြည့်သွားမယ်လို့ ပြောခဲ့ပါတယ်။

အမေရိကန်ဟာ တရုတ်တနိုင်ငံတည်း မူဝါဒကို လိုက်နာတယ်၊ နှစ် နိုင်ငံလုံးဟာ စစ်တပ်ချင်းကြား ဆက်ဆံရေးရဲ့ ခက်ခဲတဲ့ ပြဿနာတွေကို သင့်တော်မှုရှိရှိ ကိုင်တွယ်ပြီး ယှဉ်ပြိုင်မှုတွေ၊ ဘေးအန္တရာယ်တွေကိုလည်း တာဝန်ယူတဲ့နည်းလမ်းနဲ့ စီမံခန့်ခွဲသင့်တယ်လို့ အော်စတင်က ဆက်ပြောပါတယ်။

အဲဒီနောက် ဝန်ကြီး ၂ ဦးဟာ ယူကရိန်းအခြေအနေနဲ့ ပင်လယ်ရေကြောင်း၊ လေကြောင်း လုံခြုံရေးကိစ္စတွေအပေါ် အမြင်တွေ ဖလှယ်ခဲ့ကြပြီး ပင်လယ်ပြင်မှာ စစ်ရေးအရ ရန်စတာတွေကို ရပ်တန့်ဖို့နဲ့ တရုတ်ကို အပုပ်ချ၊ ဘောင်ခတ်တာမျိုးကို ရှောင်ကြဉ်ဖို့လည်း တရုတ်က အမေရိကန်ကို တိုက်တွန်းခဲ့ပါတယ်။