စစ်ကိုင်းတိုင်း၊ ယင်းမာပင်မြို့နယ်မှာ ဧပြီ ၂၂ ရက် မနက် ၁၁ နာရီလောက်က လမ်းသွားလမ်းလာ ပြည်သူတွေကို စစ်ဆေးရေးအမည်ခံ ပိုက်ဆံတောင်းနေတဲ့ စစ်ကောင်စီတပ်ဖွဲ့ဝင်တွေ မိုင်းဆွဲတိုက်ခိုက်ခံခဲ့ရတယ်လို့ ဒေသခံတွေက ပြောပါတယ်။

မုံရွာ ပုသိမ် ကားလမ်းပိုင်းပေါ်မှာ တိုက်ခိုက်ခံရတာဖြစ်ပြီး အမှတ် ၂၈ လုံခြုံရေးရဲတပ်ဖွဲ့(ခွဲ) စခန်းနဲ့ အောင်ဇေယျကွက်သစ် (ဒေသခေါ် ရွှေတောင်ဦးကုန်း) ကြားမှာလို့ ဆိုပါတယ်။

မိုင်းဆွဲတိုက်ခိုက်ခံခဲ့ရတဲ့တပ်ဖွဲ့ဟာ အမှတ် ၂၈ လုံခြုံရေးရဲတပ်ဖွဲ့ထဲက ရဲတပ်သားတွေလို့ သိရပြီး တချို့က အရပ်ဝတ်တွေ ဝတ်ဆင်ထားကြသလို ယူနီဖောင်းဝတ်တွေလည်း ပါဝင်ကာ အင်အား  ၂၀ လောက်ရှိတယ်လို့ ဒေသခံတဦးက ပြောပါတယ်။

မိုင်းဆွဲတိုက်ခိုက်မှုကြောင့် စစ်ကောင်စီတပ်သား ၁၀ ယောက် ထက်မနည်း ကျဆုံးနိုင်တယ်လို့ သတင်းထွက်နေပေမဲ့ အရေအတွက် အတိအကျကိုတော့ အတည်ပြုနိုင်ခြင်းမရှိသေးပါဘူး။

စစ်ကောင်စီတပ်ဖွဲ့ဟာ မကြာခဏဆိုသလို လမ်းသွားလမ်းလာ ပြည်သူတွေကို တားပြီး စစ်ဆေးရေးလုပ်တာလိုလိုနဲ့ ပိုက်ဆံတောင်းလေ့ ရှိတယ်လို့လည်း ဆိုပါတယ်။

အခုလို မိုင်းဆွဲတိုက်ခိုက်တာကို ဘယ်အဖွဲ့အစည်းတွေက လုပ်ဆောင်ခဲ့တယ် ဆိုတာကိုတော့ လက်ရှိအချိန်ထိ ထုတ်ပြန်ကြေညာတာ မရှိသေးပါဘူး။