ဒေါ့မွန်တိုက်စစ်မှူး ဟာလန်းဟာ မန်စီးတီးအသင်းဆီပြောင်းရွှေ့ဖို့ အလွန်နီးစပ်နေပြီလို့ ဘီဘီစီသတင်းက ဖော်ပြသွားပါတယ်။ 

ဟာလန်းဟာ ဒေါ့မွန်အသင်းနဲ့ ၂၀၂၄ ခုနှစ်အထိ စာချုပ်သက်တမ်း ကျန်ရှိနေပေမယ့် စာချုပ်ဖျက်သိမ်းကြေး ပေါင် ၆၂ ဒသမ ၈ သန်း ပေးချေမယ်ဆိုရင် ခေါ်ယူခွင့်ရရှိနိုင်တာပါ။ 

မန်စီးတီးအသင်းဟာ ဟာလန်းကိုခေါ်ယူနိုင်ဖို့ အပြီးသတ်သဘောတူညီမှု မရရှိသေးပေမယ့် မန်စီးတီးကစားသမားဖြစ်လာလိမ့်မယ်လို့ သိမြင်နေကြောင်း ဘီဘီစီရဲ့ ဥရောပရေးရာ  ဘောလုံးကျွမ်းကျင်သူ ဘာလက်ချ်က ပြောပါတယ်။ 

ဟာလန်းကို ဘာစီလိုနာနဲ့ ရီးရဲလ်မက်ဒရစ် အသင်းတွေကလည်းခေါ်ယူဖို့ စိတ်ဝင်စားနေပေမယ့် ကစားသမားကိုယ်တိုင်က ပရီးမီးယားလိဂ်ကို ပြောင်းရွှေ့ကစားချင်နေတယ်လို့ သိရပါတယ်။ 

မန်စီးတီးနည်းပြ ဂွါဒီယိုလာကတော့ ဟာလန်းရဲ့ အပြောင်းအရွှေ့နဲ့ ပတ်သက်ပြီး ဖြေကြားဖို့ ငြင်းဆန်ထားပါတယ်။ 

အသက်၂၁နှစ်ရှိ နော်ဝေတိုက်စစ်မှူးဟာ အခုနှစ် ဘွန်ဒက်စ်လီဂါပွဲ ၂ဝမှာ ၁၈ ဂိုးသွင်းပြီး ၇ ကြိမ် ဂိုးဖန်တီးမှု ပြုလုပ်ထားပါတယ်။