မေဒေးနေ့ ဆန္ဒပြပွဲ ပြင်သစ်အပါအဝင် နိုင်ငံအမြောက်အမြား၌ ပြုလုပ်

ပြင်သစ်နိုင်ငံတဝန်း မနေ့က မေဒေးနေ့ ဆန္ဒပြပွဲမှာ လူထောင်ပေါင်းများစွာ ပါဝင်ခဲ့ကြပြီး လူမှုတရားမှုတရေး၊ လုပ်ခလစာ တိုးမြှင့်ရေးနဲ့ ပင်စင်သက်ကို တိုးမယ့် အစီအစဉ်ကို ပယ်ဖျက်ဖို့ တောင်းဆိုကြပါတယ်။
ပါရီမြို့က ဆန္ဒပြပွဲမှာ အလုပ်သမားသမဂ္ဂခေါင်းဆောင်တွေ၊ လက်ဝဲပါတီတွေက ခေါင်းဆောင်တွေလည်း ပူးပေါင်းပါဝင်တာ တွေ့ရပါတယ်။
ပါရီအရှေ့ဘက်က လာနေရှင်းစကွဲ ရင်ပြင်မှာ ဆန္ဒပြသမားတွေကို အဓိကရုဏ်း ရဲက မျက်ရည်ယိုဗုံးတွေနဲ့ လူစုခွဲတဲ့အခါ ဆန္ဒပြသမားတွေဘက်က အနီးအနားရှိတဲ့ ပစ္စည်းတွေ၊ အရာဝထ္ထုတွေနဲ့ ပြန်လည်ပစ်ပေါက်တဲ့အထိ ရုတ်ရုတ်သဲသဲ ဖြစ်ကုန်ပါတယ်။
တခြားမြို့ကြီး အနည်းဆုံး လေးမြို့မှာလည်း ဆန္ဒပြပွဲတွေ ပေါ်ပေါက်ခဲ့ပါတယ်။
အလားတူ ဂျာမနီ၊ တူရကီ၊ ချီလီ၊ ကျူဘား စတဲ့ နိုင်ငံတို့မှာလည်း မေဒေးနေ့ အလုပ်သမား သပိတ်တွေ ပေါ်ပေါက်ခဲ့ပါတယ်။
ဂျာမနီနိုင်ငံမှာ မေးဒေးနေ့ လမ်းလျှောက်ချီတက်ပွဲမှာ လူ ၁ သောင်းလောက် ပူးပေါင်း ပါဝင်တယ်လို့ ရဲအဖွဲ့က ပြောပါတယ်။
ဂျာမနီမှာ အရင်နှစ်တွေက မေဒေးနေ့ အလုပ်သမား သပိတ်တွေအတွင်း ရုန်းရင်းဆန်ခတ် ဖြစ်ခဲ့ဖူးတာကြောင့် မနေ့က တနိုင်ငံလုံးမှာ ရဲအင်အား ၆၀၀၀ နီးပါး ချထားတယ်လို့ ဆိုပါတယ်။
မနေ့က ဆန္ဒပြပွဲတွေမှာ အရင်နှစ်တွေနဲ့ မတူ၊ ငြိမ်းငြိမ်းချမ်းချမ်းရှိခဲ့တယ်လို့ ရဲအဖွဲ့က ပြောပါတယ်။
ချီလီနိုင်ငံမှာတော့ မေဒေးနေ့ ဆန္ဒပြပွဲအတွင်း ရဲတွေနဲ့ ဆန္ဒပြသမားတွေ ထိပ်တိုက်တွေ့ခဲ့ ကြပါတယ်။
မြို့တော်ဆန်တီယေဂိုမှာ ဆန္ဒပြသူတွေကို ရဲက လူစုခွဲတဲ့အတွက် ရုတ်ရုတ်သဲသဲဖြစ်ခဲ့ပြီး ၂ ယောက်ကို ဖမ်းဆီးခဲ့တယ်လို့ ရဲအဖွဲ့က ပြောပါတယ်။
တူရကီနိုင်ငံမှာလည်း မေဒေးနေ့ ဆန္ဒပြပွဲနဲ့ ပတ်သက်ပြီး လူဒါဇင်နဲ့ချီ အဖမ်းခံလိုက်ရတယ်လို့ ရိုက်တာသတင်းက ဆိုပါတယ်။
အကြီးဆုံးမြို့ဖြစ်တဲ့ အစ္စတန်ဘူလ်းမြို့မှာ ဆန္ဒပြသမားတွေက ငွေကြေး ဖောင်းပွဲမှုနဲ့ စီးပွားရေး ကြပ်တည်းမှုကို မကျေနပ်ကြောင်း ထုတ်ဖော်ဆန္ဒပြရင်း ရဲတွေနဲ့ ထိပ်တိုက်တွေ့ခဲ့ကြတာပါ။
ကျူးဘားနိုင်ငံမှာတော့ မေဒေးနေ့ ချီတက်ပွဲကို ဟာဗားနားက တော်လှန်ရေးရင်ပြင်မှာ ပြုလုပ်ခဲ့ပြီး သမ္မတ မစ်ဂဲ ဒီယက် ကနယ်နဲ့ သမ္မတဟောင်း ရာအူး ကက်စထရိုတို့ ကိုယ်တိုင် တက်ရောက်လာတာ တွေ့ရပါတယ်။
မေဒေးနေ့ အခမ်းအနားဟာ ဆိုရှယ်လစ် ကျူးဘားအတွက် အရေးကြီးနေ့တွေထဲက တရက်ဖြစ်ပြီး ကိုဗစ်-၁၉ ကပ်ဘေးကြောင့် နှစ်နှစ်လောက် မကျင်းပနိုင်ခဲ့ဘဲ ဒီနှစ်မှာ ပြန်လည် ကျင်းပတာ ဖြစ်ပါတယ်။