အိန္ဒိယနိုင်ငံမှာ ကိုဗစ်-၁၉ ကပ်ရောဂါ ကူးစက်ခံရပြီး သေဆုံးသူ တရားဝင်ဦးရေထက် အမှန်တကယ် သေဆုံးသူ ဦးရေက ၁၀ ဆများခဲ့တယ်ဆိုတဲ့ ကမ္ဘာ့ကျန်းမာရေးအဖွဲ့ကြီး (WHO) ရဲ့ အစီရင်ခံစာကို အိန္ဒိယအစိုးရက မေ ၅ ရက်မှာ ပယ်ချလိုက်ပါတယ်။

ဒယ်လ်တာ ဗီဇမျိုးကွဲကြောင့် စံချိန်တင် ကူးစက်ခဲ့ချိန်က ဆေးရုံတွေမှာ အောက်ဆီဂျင်အိုးတွေ၊ ခုတင်တွေ ပြတ်လပ်ခဲ့တဲ့အတွက် မနှစ်ကအထိ ကပ်ဘေးကြောင့် အိန္ဒိယမှာ လူ ၄ ဒသမ ၇သန်း သေဆုံးခဲ့တယ်လို့ WHO က မေ ၅ ရက်မှာ အစီရင်ခံစာ ထုတ်ပြန်ခဲ့တာပါ။

အိန္ဒိယဝန်ကြီးချုပ် နရင်ဒြာမိုဒီ အစိုးရက အစီရင်ခံစာကို ငြင်းဆိုပယ်ချခဲ့ပါတယ်။ WHO ရဲ့ ခန့်မှန်းချက်ဟာ ပုံစံနဲ့ ထင်မြင်ယူဆချက်တွေအပေါ် အခြေခံထားတယ်လို့ ပြောရင်း အိန္ဒိယအစိုးရက ပယ်ချခဲ့တာလို့ အကြီးတန်း ကျန်းမာရေးအရာရှိတယောက်က ပြောပါတယ်။

အိန္ဒိယအစိုးရဟာ ကိုဗစ်-၁၉ ကပ်ဘေးကြောင့် လူ ၅၂၄,၀၀၂ ယောက်သာ သေဆုံးတယ်လို့ အစီရင်ခံထားတာပါ။ ဒါတောင် အမေရိကန်နဲ့ ဘရာဇီးပြီးရင် ကူးစက်ခံ သေဆုံးသူ တတိယအများဆုံးနိုင်ငံ ဖြစ်ခဲ့ပါတယ်။

အိန္ဒိယနိုင်ငံမှာ ကိုဗစ်-၁၉ ကူးစက်ခံ ဦးရေကတော့ ၄၃ သန်း ကျော်ခဲ့တာပါ။ အမှန်တကယ် ကူးစက်ခံဦးရေဟာ လူဦးရေ ၁ ဒသမ ၃၅ ဘီလီယံရှိတဲ့ နိုင်ငံအတွင်း လူသန်းရာချီမယ်လို့ ယုံကြည်ထားပါတယ်။

ခုအချိန်အထိ ကမ္ဘာလုံးဆိုင်ရာ ကပ်ရောဂါကြောင့် အစစ်အမှန် သေဆုံးမှုကို အပြည့်စုံဆုံး ဆန်းစစ်ရာမှာ ၂၀၂၁ ခုနှစ်အကုန်မှာ ကိုဗစ်-၁၉ ကပ်ရောဂါနဲ့ ဆက်စပ်သေဆုံးသူ ၁၄ ဒသမ ၉ သန်းကျော် ရှိခဲ့တယ်လို့ ကုလသမဂ္ဂအဖွဲ့က မေ ၅ ရက်မှာ ပြောခဲ့ပါတယ်။