ဂျပန်ပင်လယ်၊ အရှေ့တရုတ်ပင်လယ်နဲ့ အနောက်ပစိဖိတ်ဒေသတွေထဲမှာ မေ ၂၄ ရက်က တရုတ်-ရုရှား ပူးတွဲ လေကြောင်းကင်းလှည့်တာဟာ ဘယ်နိုင်ငံကိုမှ ရည်ညွှန်းတာ မဟုတ်ဘူးလို့ တရုတ်စစ်တပ်က မေ ၂၅ ရက်မှာ ပြောလိုက်ပါတယ်။

နှစ်နိုင်ငံ လေတပ်တွေကြား ပူးပေါင်းဆောင်ရွက်မှုအဆင့် တိုးတက်စေဖို့၊ စမ်းသပ်ဖို့၊ ဗျူဟာမြောက် အပြန်အလှန် ယုံကြည်မှုနဲ့ စစ်တပ်နှစ်ခုကြား လက်တွေ့ကျကျ ပူးပေါင်းဆောင်ရွက်ရေး တိုးမြှင့်ဖို့ ရည်ရွယ်တယ်လို့ တရုတ်ကာကွယ်ရေးဝန်ကြီးဌာန ပြောခွင့်ရ ဝူချန်းက အစိုးရမီဒီယာ စီစီတီဗီကို ပြောကြားခဲ့ပါတယ်။

ဒါဟာ လက်ရှိ နိုင်ငံတကာနဲ့ ဒေသတွင်း အခြေအနေတွေနဲ့ ဘာမှ မပတ်သက်ဘူးလို့လည်း သူက ပြောပါတယ်။

ရုရှားက ယူကရိန်းကို ကျူးကျော်ပြီးတဲ့နောက် ကင်းလှည့်တာဟာ ပထမဆုံးအကြိမ်ဖြစ်ပြီး နှစ်စဉ် ကျင်းပနေကျ စစ်ရေးလေ့ကျင့်မှုရဲ့ အစိတ်အပိုင်းလည်း ဖြစ်တယ်လို့ တရုတ်ကာကွယ်ရေး ဝန်ကြီးဌာနက သူ့ရဲ့ အင်တာနက် စာမျက်နှာပေါ်မှာ မေ ၂၄ ရက်က ထုတ်ပြန်ထားပါတယ်။

ဂျပန်နဲ့ တောင်ကိုရီးယား လေကြောင်းရန် ကာကွယ်ရေးဇုန်ထဲမှာ စစ်ရေးလေ့ကျင့်တာဟာ အမေရိကန်သမ္မတ ဂျိုးဘိုင်ဒင်ရဲ့ အာရှခရီးစဉ်နဲ့ တိုက်ဆိုင်နေပါတယ်။

ဘိုင်ဒင်ကတော့ တကယ်လို့ တရုတ်က ထိုင်ဝမ်ကို တိုက်ခိုက်ခဲ့ရင် ထိုင်ဝမ်ကို ကာကွယ်ဖို့ စစ်ရေးအရ တုံ့ပြန်ဖို့ လိုလားတယ်လို့ ပြောခဲ့တာပါ။ ဒါကြောင့် တရုတ်အစိုးရက ဒေါသထွက်ခဲ့ပါတယ်။

တရုတ်နဲ့ ရုရှားဟာ အလားတူ ပူးတွဲကင်းလှည့်တာမျိုးကို ၂၀၁၉၊ ၂၀၂၀ နဲ့ ၂၀၂၁ ခုနှစ်နှောင်းပိုင်းက ပြုလုပ်ခဲ့ပါတယ်။