ရုရှားနိုင်ငံအပေါ် ပိတ်ဆို့အရေးယူမှုတွေ ထပ်လုပ်ဖို့ ဥရောပသမဂ္ဂအတွင်း သဘောထားကွဲလွဲမှုတွေနဲ့ ပတ်သက်ပြီး ယူကရိန်းသမ္မတ ဗိုလိုဒီမာ ဇလန်းစကီးက မေ ၂၆ ရက်မှာ ပြစ်တင်ဝေဖန်လိုက်ပါတယ်။

အီးယူဟာ ရုရှားရေနံတင်သွင်းမှုအပေါ် ပိတ်ဆို့အရေးယူမှု အပါအဝင် ၆ ကြိမ်မြောက် ဒဏ်ခတ်အရေးယူမှုတွေကို ဆွေးနွေးနေတာပါ။ ဒီလုပ်ဆောင်မှုကို တညီတညွတ်တည်း လုပ်ဖို့ လိုအပ်ပေမဲ့ ဟန်ဂေရီနိုင်ငံကတော့ သူ့ရဲ့စီးပွားရေးက အရမ်းဒုက္ခရောက်လိမ့်မယ်ဆိုပြီး အခု ဒီအယူအဆကို ဆန့်ကျင်နေပါတယ်။

"အရေးယူမှုအသစ်တွေကို ထောက်ခံပေးတဲ့ မိတ်ဆွေတွေကို ကျေးဇူးတင်ကြောင်း၊ ဒါပေမဲ့ ဒီဒဏ်ခတ်ပိတ်ဆို့မှုကို ခွင့်မပြုဖို့ တချို့နိုင်ငံတွေကို ဘာကြောင့် ဆန့်ကျင်နေရတာလဲ" လို့ ဇလန်းစကီးက မိန့်ခွန်းမှာ ပြောသွားပါတယ်။

ဥရောပသမဂ္ဂဟာ ဒီ ၆ ကြိမ်မြောက် ဒဏ်ခတ်အရေးယူမှုကို သဘောတူဖို့အတွက် နောက်ထပ် ဘယ်နှပတ်လောက်များ ကြိုးစားနေဦးမှာလဲ ဆိုပြီးလည်း မေးခွန်းထုတ်လိုက်ပါသေးတယ်။

"ရုရှားအပေါ် ဖိအားပေးတာဟာ တကယ်တမ်းဆို အသက်တွေကို ကယ်တင်တဲ့ကိစ္စပါ။ ပြီးတော့ အချိန်ဆွဲတာ၊ အားလျော့တာ၊ အမျိုးမျိုးသော အငြင်းပွားမှုတွေ ဒါမှမဟုတ် ရန်လိုသူကို အေးချမ်းစေဖို့အတွက် အဆိုပြုချက်တွေ လုပ်နေတဲ့ နေ့တိုင်းဟာ ယူကရိန်းနိုင်ငံသားတွေ သတ်ဖြတ်ခံရတာကို ပိုများစေတယ်" လို့ သူက ဆိုပါတယ်။

ကမ္ဘာဟာ ရုရှားဘဏ်လုပ်ငန်းစနစ်ကို လုံးဝ သီးခြားဖယ်ကြဉ်ထားဖို့ကိုလည်း ပျက်ကွက်ခဲ့ပြီး လက်နက်ကြီးတွေကိုလည်း လုံလုံလောက်လောက် မြန်မြန်ဆန်ဆန် မပေးနိုင်ကြသေးကြောင်းလည်း သူက ထပ်ပြောခဲ့ပါတယ်။

ရုရှားနိုင်ငံဟာ စွမ်းအင်ပေးပို့မှုအတွက် ၂၇ နိုင်ငံ အီးယူအဖွဲ့ဆီကနေ တရက်ကို ယူရို ဘီလီယံ ၁၀၀ ရရှိနေတာလို့ ဆိုပါတယ်။

ဘာလင်အစိုးရကတော့ ပိတ်ဆို့အရေးယူမှုအသစ်ဆိုင်ရာ ဆွေးနွေးပွဲတွေ မကြာမီ ပြီးဆုံးမယ်လို့ မျှော်လင့်ထားကြောင်း၊ ဒါပေမဲ့ ဒါဟာ လာမယ့်သီတင်းပတ် ခေါင်းဆောင်တွေရဲ့ ထိပ်သီးအစည်းအဝေးမှာ ခေါင်းစဉ်တခု ဖြစ်လာမှာမဟုတ်ကြောင်း ဂျာမန်အရာရှိတဦးက မေ ၂၅ ရက်မှာ ပြောကြားခဲ့ပါတယ်။

ဇလန်းစကီးက ကိယက်ဗ်ဟာ ငြိမ်းချမ်းရေးကို ဆောင်ယူဖို့ လိုက်လျောမှုတွေလုပ်မယ်ဆိုတဲ့ အကြံပြုချက်ကို ခပ်ကြမ်းကြမ်း ပြန်တုံ့ပြန်လိုက်ပြီး ၁၉၃၈ ခုနှစ်က နာဇီဂျာမနီကို ကျေအေးစေဖို့ ကြိုးပမ်းမှုစိတ်ကူးလည်း တိုက်ခိုက်ခံရတာပဲလို့ ပြန်ပြောလိုက်ပါတယ်။

ဇလန်းစကီးရဲ့ ထက်ထက်မြက်မြက် မှတ်ချက်စကားတွေဟာ ကမ္ဘာ့နိုင်ငံတွေရဲ့ စစ်ပွဲကို ချဉ်းကပ်မှုအပေါ် ဝေဖန်လိုက်တာလည်း ဖြစ်ပါတယ်။