ထိုင်းနိုင်ငံမြောက်ပိုင်း ချင်းရိုင်းခရိုင်ထဲမှာ ထိုင်းနိုင်ငံအတွင်းပိုင်းကို ဆက်လက်ပို့ ဆောင်မယ့် စိတ်ကြွဆေးပြား ၁၁ သန်း ဖမ်းဆီးရမိတယ်လို့ အမှတ် ၅ တိုင်းဒေသ ရဲတပ်ဖွဲ့က မေ ၂၇ ရက် မနက် သတင်းစာရှင်းပွဲမှာ ပြောပါတယ်။ 

ပထမဖြစ်ရပ်မှာ ပြီးခဲ့တဲ့ မေ ၁၉ ရက်နေ့ ည ၉ နာရီလောက်က ထိန်းမြို့နယ်နဲ့ ချင်းရိုင်းမြို့နယ်ကြား ထာ့ဆိုင်ရပ်ကွက် ဟို့ဒွိုင်လမ်းခွဲမှာ နယ်စပ်ဘက်ကနေ မောင်းနှင်လာတဲ့ ကား နှစ်စီးပေါ်ကနေ စိတ်ကြွဆေးပြား ၄ သန်း အရင်ဖမ်းမိတာလို့ ဆိုပါတယ်။ 

အဆိုပါကား ၂ စီးဟာ ရှေ့ဆင့်နောက်ဆင့်အပြိုင်မောင်းလာတာဖြစ်ပြီး ယာဉ်မောင်းသမား ၁ ယောက် မှောင်ရိပ်ခို ထွက်ပြေးလွတ်မြောက်သွားခဲ့တယ်လို့ ခရိုင်ရဲမှူးကြီး ပီယထဝီချိုင်းက ပြောပါ တယ်။ အဆိုပါဖြစ်ရပ်ကနေ စိတ်ကြွဆေး ၄ သန်း၊ ကား ၂ စီး နဲ့ တယ်လီဖုန်း ၅ လုံးကို သိမ်း ဆည်းရမိတယ်လို့ ဆိုပါတယ်။ 

နောက်ဖြစ်စဉ်တခုမှာတော့ မေ ၂၅ ရက် မနက် ၁ နာရီခွဲလောက်က ချင်းရိုင်းခရိုင် ကျိန်းခေါင်မြို့နယ် မိုင်းကန်းစစ်ဆေးရေးဂိတ်အလွန်မှာ ဖမ်းမိခဲ့ပါတယ်။ 

မသင်္ကာဘွယ် ဟိုင်းလပ်ကားတစ်စီး လမ်းပန်းခရိုင်ဘက်ကနေ ကျိန်းခေါင်ဘက်မောင်းနှင်ကြောင်း  ယာဉ်ကြောထိန်းသိမ်းရေးစောင့်ကြည့်ကင်မရာကနေ တွေ့ရှိခဲ့ပြီး အဆိုပါယာဉ်ကို စစ်ဆေးဖို့ ရဲတပ်ဖွဲ့အချင်းချင်း ချိတ်ဆက်အကြောင်းကြားခဲ့ပါတယ်။ 

အဆိုပါကားဟာ မိုင်းကန်းစစ်ဆေးရေးဂိတ်ရောက်တော့ ရပ်မပေးဘဲဆက်မောင်းသွားလို့ တာဝန်ရှိသူတွေက ကားဘီးကို သေနတ်ဖောက်လိုက်ရကြောင်း၊ အဆိုပါကားမှာ တာ့ခ်ခရိုင်နံပါတ်ပြားဖြစ်ပြီး ယာဉ်မောင်းထွက်ပြေးသွားခဲ့ပါတယ်။ 

ကားပေါ်ကနေ အိတ်ပေါင်း ၃၅ အိတ်တွေ့ရှိကြောင်း၊ အထဲမှာ L နဲ့  AAA အမှတ်တံဆိပ်ပါ စိတ်ကြွဆေးပြား စုစုပေါင်း ၇ သန်းပါရှိတယ်လို့ ဆိုပါတယ်။ တာဝန်ရှိသူတွေက ထွက်ပြေးသွားတဲ့ ယာဉ်မောင်း နိုင်းဝိချိုင်းဆိုသူကို ပြန်ဖမ်းမိပြီး နောက်ထပ်ဆက်စပ်နေတဲ့ ကား ၃ စီးကိုပါ ဖမ်းဆီးရမိခဲ့တယ်လို့ သတင်းမှာ ဖော်ပြသွားပါတယ်။ 

အမှတ် ၅ တိုင်းဒေသ ရဲတပ်ဖွဲ့အနေနဲ့  ပြီးခဲ့တဲ့ ၂၀၂၁ အောက်တိုဘာ ၁ ရက်မှ ၂၀၂၂ နှစ် မေလ ၂၆ ရက်နေ့ထိ မူးယစ်ဆေးဝါးဖမ်းဆီးရရှိတဲ့ အမှုပေါင်း ၁၁၆ မှုကနေ စိတ်ကြွဆေး ၁၂၆၄၉၁၈၃၁ ( ၁၂၆ သန်းကျော်)  အိုက်စ် ၇၀၂ ကီလိုဂရမ်၊ ဟီးရိုးအင်း ၄၇ ကီလိုဂရမ်၊ ခေတာမင်း ၁၂၆ ကီလိုဂရမ် ဖမ်းမိခဲ့ကြောင်း၊ ပါဝင်ပတ်သက်သူတွေရဲ့ ပိုင်ဆိုင်မှု ဘတ်သန်းပေါင်း ၄၃၅ သန်းကိုလည်း နိုင်ငံပိုင်အဖြစ် သိမ်းဆည်းခဲ့တယ်လို့ ထိုင်းရတ်သတင်းမှာ ဖော်ပြပါတယ်။