ပင်လယ်ကွေ့အာရပ်နိုင်ငံတွေအနေနဲ့ ရုရှားနဲ့ ဘီလာရုစ်တို့အပေါ် ပိတ်ဆို့အရေးယူမှုတွေမှာ ပါဝင်မှာမဟုတ်ကြောင်း ဇွန် ၁ ရက်က ကြေညာခဲ့တယ်လို့ ရုရှားနိုင်ငံခြားရေးဝန်ကြီး ဆာဂီလာ့ဗ်ရော့ဗ်က ပြောပါတယ်။

ဆော်ဒီအာရေဗျနိုင်ငံ၊ မြို့တော်ရီယာ့ဒ်မှာ ရုရှားအစိုးရဟာ အာရပ်နိုင်ငံများ ပူးပေါင်းဆောင်ရွက်ရေးကောင်စီ(GCC) အဖွဲ့ဝင်နိုင်ငံတွေနဲ့ တွေ့ဆုံဆွေးနွေးပြီးနောက် အခုလို ကြေညာလိုက်တာပါ။ 

ဆာဂီလာ့ဗ်ရော့ဗ်ဟာ ဆော်ဒီအာရေဗျကို မေ ၃၁ ရက်က ရောက်ရှိခဲ့ပြီး GCC နိုင်ငံတွေက နိုင်ငံခြားရေးဝန်ကြီးတွေနဲ့ ဇွန် ၁ ရက်မှာ တွေ့ဆုံခဲ့တာဖြစ်ပြီး ဒီခရီးစဉ်ဟာ ယူကရိန်းနဲ့ ပဋိပက္ခမှာ ရုရှားအတွက် ပင်လယ်ကွေ့ အာရပ်နိုင်ငံတွေဆီက ထောက်ခံမှုရယူဖို့ ကြိုးပမ်းမှုအဖြစ် ကျယ်ကျယ်ပြန့်ပြန့် ရှုမြင်သုံးသပ်ကြပါတယ်။

အစည်းအဝေးအတွင်း ပင်လယ်ကွေ့တာဝန်ရှိသူတွေက ရုရှားနဲ့ ဘီလာရုစ်တို့အပေါ် ပိတ်ဆို့အရေးယူမှုတွေမှာ ပါဝင်မှာမဟုတ်ကြောင်း ပြောကြားခဲ့တာပါ။ 

ပင်လယ်ကွေ့နိုင်ငံတွေဟာ ရုရှား-ယူကရိန်း ပဋိပက္ခအပေါ် ရပ်တည်ချက် တူညီကြောင်းနဲ့ ဒီပဋိပက္ခကနေ ကမ္ဘာ့စားနပ်ရိက္ခာဖူလုံမှုအပေါ် အကျိုးသက်ရောက်မှုကို အလွန်စိုးရိမ်နေကြောင်း ဆော်ဒီနိုင်ငံခြားရေးဝန်ကြီးက ဆွေးနွေးပွဲအတွင်း ပြောကြားခဲ့ပါတယ်။