ဗြိတိန်ဘုရင်မကြီး အဲလစ်ဇဘက်ဟာ ဇွန် ၂ ရက်က ဘက်ကင်ဟမ်နန်းတော် အပြင်ဘက်မှာ စုပြုံရောက်ရှိနေတဲ့ လူစုလူဝေးကြီးကို လက်ဝှေ့ယမ်း နှုတ်ဆက်ပြီး ဗြိတိန်ထီးနန်းဆက်ခံခြင်း နှစ် ၇၀ ပြည့် အထိမ်းအမှတ်ပွဲတွေကို စတင်ဆင်နွှဲခဲ့ပါတယ်။

ဘုရင်မကြီးဟာ ညဘက်မှာ သူ့ရဲ့ ဝင်ဆာရဲတိုက်နေအိမ်မှာ ပလက်တီနမ်ဂျူဗလီရဲ့ အဓိကပင်မ မီးရှူးကို စတင်ထွန်းညှိလိုက်ပါတယ်။

ဗြိတိန်နဲ့ ကမ္ဘာတဝန်းရှိ သန်းနဲ့ချီတဲ့လူတွေဟာ အသက် ၉၆ နှစ်အရွယ် ဘုရင်မကြီးကို ဂုဏ်ပြုကျင်းပတဲ့ ပွဲတော်တွေမှာ ပါဝင်ဆင်နွှဲကြဖို့ အားခဲထားကြပြီး ဗြိတိန်တဝန်းနဲ့ ဓနသဟာယနိုင်ငံတွေရဲ့ မြို့ပေါင်း ၂,၀၀၀ ကျော်မှာ မီးရှူးမီးပန်းတွေ ထွန်းညှိခဲ့ကြပါတယ်။

ဗြိတိန်ထီးနန်းရဲ့ စံချိန်တင် နန်းစံသက်တမ်း နှစ် ၇၀ ပြည့်အောင်ပွဲအတွက် လေးရက်ကြာ ဖျော်ဖြေပွဲတွေ၊ ပါတီတွေနဲ့ ချီတက်ပွဲတွေကို ဇွန် ၂ ရက်က စတင်ကျင်းပခဲ့ပါတယ်။

ပွဲတော်အစနေ့မှာပဲ တော်ဝင်ထောက်ခံသူ ထောင်ပေါင်းများစွာဟာ လန်ဒန်မြို့ရဲ့ လမ်းတွေတလျှောက်မှာ အလံတွေဝှေ့ယမ်းပြီး စစ်ရေးပြချီတက်ပွဲကို စီတန်းကြည့်ရှုကြပါတယ်။ မီးရှူးမီးပန်းတွေ လင်းထိန်နေပြီး ကောင်းကင်ယံမှာလည်း မီးရှူးမီးပန်းတွေ ပြည့်နှက်နေပါတယ်။ ဗြိတိန်နိုင်ငံတဝန်းမှာ ပျော်ပွဲရွှင်ပွဲတွေ ဆင်နွှဲနေကြပါတယ်။

နန်းသက် နှစ် ၇၀ ကို ဂုဏ်ပြုတဲ့အနေနဲ့ လန်ဒန်မြို့ရှိ စိန့်ပေါလ် ကက်သီဒရယ် ဘုရားကျောင်းမှာလည်း နိုင်ငံတော်ရဲ့ ကျေးဇူးတော်နေ့ ဝတ်ပြုပွဲတွေ ဆက်လက်ကျင်းပခဲ့ပါတယ်။

ဒါပေမဲ့လည်း ဘုရင်မကြီးဟာ အထိုင်အထ အလှုပ်အရှား သွားလာရခက်ခဲတဲ့အတွက် မကြာသေးခင်ကပဲ ပွဲတွေတက်ရောက်တာကို ဖျက်သိမ်းထားပြီး ဇွန် ၂ ရက် နှောင်းပိုင်းကစလို့ လူမြင်ကွင်းကနေ အနားယူမယ်လို့ ဆိုပါတယ်။

ဘုရင်မကြီး အဲလစ်ဇဘက်ဟာ ထီးနန်းဆက်ခံသူအားလုံးထက် အချိန်ကြာမြင့်စွာ ထီးနန်းစိုးစံခဲ့ပြီး အချုပ်အခြာအာဏာပိုင် နိုင်ငံတခုရဲ့ တတိယမြောက် နန်းသက်အရှည်ဆုံး ဘုရင်တပါးလည်း ဖြစ်ပါတယ်။