အာဖဂန်နစ္စတန်တွင် အင်အားပြင်းငလျင်လှုပ်ပြီး လူပေါင်း ၂၈၀ ထက်မနည်း သေဆုံး(ရုပ်သံ)
အာဖဂန်နစ္စတန်နိုင်ငံမှာ ဇွန် ၂၂ ရက် ဒီကနေ့မနက်အစောပိုင်းက ပြင်းအား ၆ ဒသမ ၁ အဆင့်ရှိ အင်အားပြင်း မြေငလျင်တခု လှုပ်ခတ်သွားခဲ့တာကြောင့် လူပေါင်း ၂၈၀ ထက်မနည်း သေဆုံးခဲ့တယ်လို့ နိုင်ငံတကာသတင်းတွေမှာ ဖော်ပြပါတယ်။
မြေငလျင်ဟာ အာဖဂန်နစ္စတန်အရှေ့တောင်ပိုင်း ကို့စ်တ်မြို့ကနေ ၄၄ ကီလိုမီတာအကွာ၊ အနက် ၅၁ ကီလိုမီတာမှာ လှုပ်ခတ်ခဲ့တယ်လို့ အမေရိကန်ဘူမိဗေဒတိုင်းတာရေးအဖွဲ့ (ယူအက်စ်ဂျီအက်စ်)က ပြောပါတယ်။
လတ်တလော သေဆုံးသူ အနည်းဆုံး ၂၈၀ လောက်နဲ့ ဒဏ်ရာရသူတွေလည်း အများအပြားရှိနေပြီး သေဆုံးသူအရေအတွက် ထပ်တိုးလာဖွယ်ရှိနေပါတယ်။
တာလီဘန်အုပ်ချုပ်ရေးအဖွဲ့ သဘာဝဘေးအန္တရာယ်ဆိုင်ရာ ဝန်ကြီးဌာန အကြီးအကဲ မိုဟာမက် နာဆင်းမ် ဟက်ကာနီကတော့ အစိုးရအနေနဲ့ ငလျင်ဘေးတုံ့ပြန်ဆောင်ရွက်ရေး အချိန်နဲ့တပြေးညီ လုပ်ဆောင်နေပြီး ထိခိုက်ဒဏ်ရာရရှိသူတွေလည်း ရှိနေနိုင်တယ်လို့ ပြောပါတယ်။
“ကျနော်တို့ ကနဦး ရရှိတဲ့ သတင်းတွေအရ ဒီငလျင်ကြောင့် ထိခိုက်ဆုံးရှုံးမှုတွေ၊ ဒဏ်ရာရရှိသူတွေ ရှိခဲ့ပါတယ်။ ဆက်လက်ပြီးတော့ စုံစမ်းစစ်ဆေးနေပါတယ်။”
လတ်တလောမှာတော့ ငလျင်ဒဏ်ခံစားခဲ့ရတဲ့ ပါကစ္စတန်နိုင်ငံဘက်က သေဆုံးထိခိုက်ဒဏ်ရာရရှိသူတွေနဲ့ ပတ်သက်တဲ့ အချက်အလက်တွေကိုတော့ မသိရသေးပါဘူး။
ဥရောပမြေထဲပင်လယ်ငလျင်ဆိုင်ရာဌာန (အီးအမ်မ်အက်စ်စီ) ကတော့ ကီလိုမီတာ ၅၀၀ ကျော်လောက်က ပါကစ္စတန်၊ အာဖဂန်နစ္စတန်နဲ့ အိန္ဒိယနိုင်ငံတွေက လူပေါင်း ၁၁၉ သန်းလောက်ဟာ ငလျင်လှုပ်ခါမှုကို ခံစားခဲ့ရတယ်လို့ တွစ်တာပေါ်မှာ ရေးသားမျှဝေထားခဲ့ပါတယ်။
ငလျင်လှုပ်ခါမှုကို ခံစားခဲ့ကြရတဲ့ နေရာတွေထဲမှာတော့ မျက်မြင်ကြုံတွေ့ခဲ့ကြသူတွေရဲ့ ပြောကြားချက်တွေအရ အာဖဂန်နစ္စတန်နိုင်ငံမြို့တော် ကဘူးလ်၊ ပါကစ္စတန်နိုင်ငံမြို့တော် အစ္စလာမ်မာဘတ်စတဲ့ နေရာတွေလည်း ပါဝင်နေတယ်လို့ ဆိုပါတယ်။
ကဘူးလ်မြို့က ငလျင်ကို ကြုံတွေ့ခဲ့သူတယောက်ကတော့ “ပြင်းထန်ပြီး အကြာကြီးဆောင့်တယ်”လို့ တွစ်တာပေါ်ကတဆင့် ရေးသားထားခဲ့ပြီး ပါကစ္စတန်နိုင်ငံ အနောက်မြောက်ပိုင်း ပက်ရှ်ဝါမြို့ခံတယောက်ကလည်း ငလျင်ဟာ အားပြင်းကြောင်း မျှဝေထားခဲ့ပါတယ်။
