ဝီကီလိခ်စ်တည်ထောင်သူ ဂျူလီယန်အာဆန်းဂျ်ရဲ့ အပြစ်ကင်းစင်မှုကို ခုခံကာကွယ်ပြီး အရင်ခိုလှုံခွင့် ကမ်းလှမ်းချက်ကို သက်တမ်းတိုးပေးထားကြောင်း ရေးသားထားတဲ့ စာတစောင်ကို အမေရိကန်သမ္မတ ဂျိုးဘိုင်ဒန်ဆီ ပေးပို့ခဲ့တယ်လို့ ဇူလိုင် ၁၈ ရက်မှာ မက္ကဆီကိုသမ္မတ အန်ဒရေးစ် မာနူယယ် လိုပက်ဇ် အိုဘရာဒေါက ပြောကြားလိုက်ပါတယ်။  

အာဆန်းဂျ်ဟာ ကြီးလေးတဲ့ ဘာရာဇ၀တ်မှုကိုမှ မကျူးလွန်ကြောင်းနဲ့ သူ့ကို ဖမ်းဆီးတာဟာ သူ့ရဲ့လွတ်လပ်စွာ ထုတ်ဖော်ပြောဆိုခွင့်ကို ချိုးဖောက်တာ ဖြစ်ကြောင်း သမ္မတ လိုပက်ဇ် အိုဘရာဒေါ က ပုံမှန်သတင်းစာရှင်းလင်းပွဲမှာ ပြောကြားခဲ့တာပါ။ 

လိုပက်ဇ် အိုဘရာဒေါဟာ အာဆန်းဂျ်ကို ခိုလှုံခွင့်ပေးကြောင်း အမေရိကန်သမ္မတ ဒေါ်နလ်ထရမ့်ပ် ရာထူးမဆင်းခင်က စာပေးပို့ခဲ့ကြောင်းနဲ့ ၂၀၂၁ ခုနှစ်မှာ ဘိုင်ဒန်ရဲ့ သမ္မတသက်တမ်းအစမှာ တခါ ထပ်ပြီး စာပေးပို့ခဲ့ကြောင်း ဒီနှစ်အစောပိုင်းမှာ ပြောကြားခဲ့ပါတယ်။

သမ္မတ လိုပက်ဇ်အိုဘရာဒေါဟာ အာဆန်းဂျ်ကို "ကျွန်ုပ်တို့ခေတ်ရဲ့ အကောင်းဆုံးဂျာနယ်လစ်" လို့ လည်း ပြီးခဲ့တဲ့လက ခေါ်ဆိုခဲ့ပါတယ်။