အီတလီအရှေ့မြောက်ပိုင်းနဲ့ ဥရောပနိုင်ငံတွေမှာ တောမီးအများအပြား လောင်ကျွမ်းနေပြီး စပိန်၊ အီတလီ၊ ဂရိနဲ့ ပြင်သစ်နိုင်ငံတို့မှာ မီးငြှိမ်းသတ်ရေးနဲ့ ဒေသခံနယ်မြေတွေဆီ မီးကူးလာတာကို တားဆီးရေးတွေ အရှိန်မြှင့် လုပ်ဆောင်နေရပါတယ်။

စပိန်နိုင်ငံ အနောက်မြောက်ပိုင်းရှိ ဇာမိုရာပြည်နယ်မှာ တောမီးလောင်ကျွမ်းမှုဟာ ဇူလိုင်လ ၁၉ ရက်မှာ အနီးနားရှိ လယ်ကွင်းတွေနဲ့ တောအုပ်တွေကို ဖြတ်ကျော်လာပြီးနောက်မှာ လူနေ အဆောက်အအုံတွေဆီ ပိုနီးကပ်လာပါတယ်။

စပိန်နိုင်ငံမှာ တောမီး ၃၀ ကျော် ဆက်လက်လောင်ကျွမ်းနေပြီး အာဏာပိုင်တွေဟာ ကားစတီးလ်၊ လီယွန်နဲ့ ဂါလီစီယာ ဒေသတွေက မီးလောင်မှု လေးခုကို အထူးအာရုံစိုက်နေကြပါတယ်။

လူ ၂ ဦး သေဆုံးပြီး ၃ ဦး ပြင်းထန်စွာ ဒဏ်ရာရရှိခဲ့တဲ့ ဇာမိုရာပြည်နယ်ရှိ လိုဆာစီယို မြူနီစီပယ် နယ်မြေက ကျေးရွာ ၃၂ ရွာရှိ လူပေါင်း ၆၀၀၀ ကျော်ကို ဘေးလွတ်ရာ ရွှေ့ပြောင်းပေးခဲ့ပါတယ်။

ပြင်သစ်နိုင်ငံအနောက်တောင်ပိုင်းက တောမီးအကြီးအကျယ်လောင်ကျွမ်းမှုကို ထိန်းချုပ်နိုင်ဖို့ မီးသတ်သမားတွေ အသည်းအသန် ကြိုးစားနေရပါတယ်။

လန်ဒန်ရှိ မိုးကုပ်စက်ဝိုင်းပေါ်မှာ မီးခိုးတွေတက်လာပြီး ဂရိနိုင်ငံရဲ့ အေသင်က တောင်စောင်းတွေမှာလည်း မီးလောင်ခဲ့ပါတယ်။

လူသားကြောင့်ဖြစ်ရတဲ့ ရာသီဥတု ဖောက်ပြန်မှုကြောင့် မိုးခေါင်ရေရှားခြင်းနဲ့အတူ ပြင်းထန်တဲ့ တောမီးလောင်ကျွမ်းမှု အရေအတွက်ဟာ လာမယ့် ၂၈ နှစ်အတွင်း ၃၀ ရာခိုင်နှုန်း တိုးလာမယ်လို့ ခန့်မှန်းထားကြောင်း ၂၀၂၂ ခုနှစ် ဖေဖော်ဝါရီ ကုလသမဂ္ဂအစီရင်ခံစာအရ သိရပါတယ်။