မြောက်အတ္တလန္တိတ် စစ်ရေးမဟာမိတ်အဖွဲ့ နေတိုးရဲ့ အဖွဲ့ဝင်နိုင်ငံပေါင်း ၁၉ နိုင်ငံက တပ်ဖွဲ့တွေဟာ ဂျာမနီနိုင်ငံ ဂရာဖန်ဝေါမှာ ဇူလိုင် ၂၀ ရက်က အမြောက်ပစ်ခတ်ရေး လေ့ကျင့်ခဲ့ကြပါတယ်။

ယူကရိန်းကို ရုရှားက ကျူးကျော်အပြီးမှာ "အဆင်သင့်ဖြစ်မှုနဲ့ အပြန်အလှန်ပူးပေါင်းဆောင်ရွက်မှုကို တိုးမြှင့်" ဖို့ ရည်ရွယ်တဲ့ Dynamic Front 22 စစ်ရေးလေ့ကျင့်မှုမှာ အမေရိကန်၊ ဗြိတိန်နဲ့ ဥရောပတဝန်းက တပ်ဖွဲ့ဝင် ၂၄၀၀ လောက် ပါတယ်လို့ စီစဉ်သူတွေက ပြောပါတယ်။ 

"ကျနော်တို့ရဲ့ အရှေ့ခြမ်းမှာ ဖြစ်ပျက်နေတာကို ကြည့်ရင် ရုရှား -ယူကရိန်း ပဋိပက္ခရဲ့ နှစ်ဘက်စလုံးမှာ အမြောက်လက်နက်တွေက အဓိကကျတဲ့ အခန်းကဏ္ဍကနေ ပါနေတာ တွေ့ရတယ်" လို့ အမေရိကန် တပ်မတော် ဗိုလ်ချုပ်ကြီး စတီဖှင် မာရာနီယံက ပြောပါတယ်။

ဒီစစ်ရေး လေ့ကျင့်မှုမှာ ယူကရိန်းပဋိပက္ခအတွင်း ဖြန့်ကြက်ထားတဲ့ လက်နက်စနစ်တချို့ ပါဝင်ပြီး အမေရိကန်လုပ် M270 မျိုးစုံပစ်လွှတ်နိုင်တဲ့ ဒုံးကျည်စနစ် (MLRS) လည်း ပါပါတယ်။

ပထမဆုံး M270 စနစ်တွေ ရောက်လာပြီလို့ ယူကရိန်းက ဇူလိုင် ၁၅ ရက်မှာ ပြောခဲ့ပေမယ့် ဘယ်နိုင်ငံက လှူဒါန်းခဲ့တယ်ဆိုတာ မပြောခဲ့ပါဘူး။

"ဒါတွေဟာ စစ်မြေပြင်မှာရှိတဲ့ HIMARS ဒုံးကျည်စနစ်တွေအတွက် ကောင်းတဲ့တွဲဖက် ဖြစ်လိမ့်မယ်လို့ ရုရှလက်နက်တိုက်တွေနဲ့ စစ်တန်းလျားတွေကို တိုက်ခိုက်ရာမှာသုံးတဲ့ အမေရိကန်က လှူတဲ့စနစ်တွေကို ရည်ညွှန်းပြီး ဝန်ကြီး အိုလက်စီး ရက်ဇ်နီကို့ဗ်က တွစ်တာလူမှုကွန်ရက်ပေါ်မှာ ရေးခဲ့ပါတယ်။

ဂျာမနီတောင်ပိုင်း ဂရာဖန်ဝေါ လေ့ကျင့်ရေးဧရိယာမှာ Dynamic Front 22 စစ်ရေး လေ့ကျင့်ခန်းကို ဇူလိုင် ၆ ရက်မှ ဇူလိုင် ၂၄ ရက်အထိ လေ့ကျင့်နေတာပါ။

ဒီစစ်ရေးလေ့ကျင့်မှုထဲမှာ လက်နက်စနစ် ၅၅ ခု၊ အမြောက် ၁,၁၈၆ စင်းနဲ့ ဒုံးကျည် ၂၄၄ စင်းတို့ ပါမယ်လို့ စီစဉ်သူတွေက ပြောခဲ့ပါတယ်။