မန်ယူနိုက်တက်အသင်းဟာ ပရီးမီးယားလိဂ် ရာသီအစမှာ နှစ်ပွဲဆက်ရှုံးနိမ့်သွားခဲ့ပြီးနောက် ရိုနယ်ဒိုရဲ့ အနာဂတ်နဲ့ပတ်သက်လို့လည်း ခန့်မှန်းချက်တွေ ပြန်လည် မြင့်တက်လာပါတယ်။

ပေါ်တူဂီ ဘောလုံးသမားဟာ အိုထရက်ဖို့ဒ်မှာ ပြန်ကစားနေတာ တနှစ်တောင် မပြည့်သေးပေမဲ့ စက်တင်ဘာ ၁ ရက် အပြောင်းအရွှေ့ ရာသီမပိတ်ခင်မှာ အသင်းကနေ ပြန်လည် ထွက်ခွာသွားတော့မလားဆိုပြီး ခန့်မှန်းနေကြပြန်ပါတယ်။

နည်းပြသစ် အဲရစ်တန်ဟက်ဂ် လက်အောက်မှာ မန်ယူဟာ စနေနေ့က ဘရန်းဖို့ဒ်အသင်းကို ၄ ဂိုး ပြတ်ရှုံးပြီးနောက်မှာ အမှတ်ပေးဇယားအောက်ဆုံးကို ရောက်သွားပါတယ်။

နည်းပြသစ် တန်ဟက်လည်း ၁၉၂၁ ခုနှစ်တုန်းက နည်းပြ ဂျွန် ချပ်မန်းလိုပဲ မန်ယူသမိုင်းမှာ အဖွင့် နှစ်ပွဲ ရှုံးတဲ့ နည်းပြအဖြစ် နာမည်ဆိုး မှတ်တမ်းဝင်သွားပါတယ်။

တန်ဟက်က ရိုနယ်ဒိုကို အသင်းမှာ ဆက်ထားချင်တယ်လို့ လူသိရှင်ကြား ပြောထားပေမဲ့ အသင်း အုပ်ချုပ်ရေးအပိုင်းနဲ့ နည်းပြတို့ကြားမှာ သဘောထား ညှိနှိုင်းနေရတဲ့ သဘောရှိပါတယ်။

ကမ္ဘာ့အကောင်းဆုံး ဘောလုံးသမားဆု ငါးကြိမ်ရရှိခဲ့ဖူးတဲ့ ရိုနယ်ဒိုကို စပိန်လာလီဂါအသင်း ဖြစ်တဲ့ အက်သလက်တီကိုမက်ဒရစ်နဲ့ ဘွန်ဒက်လီဂါချန်ပီယံအသင်း ဘိုင်ယန်မြူးနစ်တို့က ခေါ်ယူဖို့ ချိတ်ဆက်နေတယ်လို့ သတင်းတွေထွက်ခဲ့ဖူးပါတယ်။