ရုရှားစစ်ဘက်နေရာများနှင့် ဝေးဝေးနေရန် ပြည်သူများကို ယူကရိန်းသမ္မတ သတိပေး
ရုရှား သိမ်းပိုက်ထားတဲ့ ခရိုင်းမီးယားဒေသတွင်း ပေါက်ကွဲမှုတွေရဲ့ နောက်ကွယ်မှာ ဖြစ်နိုင်ချေ အကြောင်းအမျိုးမျိုး ရှိနိုင်တယ်လို့ ယူကရိန်းသမ္မတ ဗိုလိုဒီမာ ဇလန်းစကီးက သြဂုတ် ၁၆ ရက်မှာ ပြောလိုက်ပါတယ်။
သိမ်းပိုက်ထားတဲ့ နယ်မြေတွေက ပြည်သူတွေအနေနဲ့ ရုရှားစစ်ဘက်နေရာတွေနဲ့ ဝေးဝေးမှာ နေကြဖို့ကိုလည်း သတိပေးလိုက်ပါတယ်။
ရုရှားက ယူကရိန်းကို ကျူးကျော်မှုအတွက် အရေးပါတဲ့ ထောက်ပံ့ရေးလိုင်းဖြစ်တဲ့ ခရိုင်းမီးယားက စစ်စခန်းတခုမှာ မနေ့က ဖောက်ခွဲမှုအသစ်တွေ ဖြစ်ခဲ့ပြီး အဲဒီအတွက် ယူကရိန်းမှာ တာဝန်ရှိတယ်လို့ ရုရှားအစိုးရက အရိပ်အမြွက်ပြောခဲ့ပါတယ်။
ခရိုင်းမီးယားကျွန်းဆွယ် မြောက်ပိုင်းရှိ စစ်စခန်းတခုမှာ ခဲယမ်းမီးကျောက်တွေ ပေါက်ကွဲခဲ့ပြီး ရထားတွေ ပြတ်တောက်ခဲ့တာပါ။
လူပေါင်း ၂,၀၀၀ လောက်ကို အနီးနား ရွာတွေကနေ ဘေးလွတ်ရာ ရွှေ့ပြောင်းခိုင်းခဲ့တယ်လို့ ရုရှားအာဏာပိုင်တွေနဲ့ သတင်းအေဂျင်စီတွေက ပြောခဲ့ပါတယ်။
