အင်ဂိုလာနိုင်ငံမှာ ဒီတစ်ပတ်ကျင်းပမယ့် ရွေးကောက်ပွဲမတိုင်ခင် သြဂုတ် ၂၂ ရက်က သမ္မတလောင်း ကိုယ်စားလှယ်တွေရဲ့ တစ်လတာ မဲဆွယ်စည်းရုံးရေးကာလ အပြီးသတ်ခဲ့ပါတယ်။

အာဖရိကရဲ့ ရေနံထုတ်လုပ်မှုအများဆုံးနိုင်ငံဖြစ်တဲ့  အင်ဂိုလာနိုင်ငံကို ဂျိုဝါ လိုရန်ကို ဦးဆောင်တဲ့ လက်ရှိ အာဏာရ MPLA ပါတီက ၂၀၁၇ ခုနှစ်ကတည်းက အုပ်ချုပ်လာခဲ့တာဖြစ်ပါတယ်။

ရေနံကြွယ်ဝမှုကို အားလုံးအတွက် ကောင်းမွန်တဲ့ လူနေမှုဘဝအဖြစ် ပြောင်းလဲပေးဖို့ အစိုးရရဲ့ ပျက်ကွက်မှုအပေါ် ဒေါသတွေ ကြီးထွားလာတာကြောင့် လူငယ်အများစု ပါဝင်လာတဲ့ အတိုက်အခံပါတီ UNITA က အရင်ကထက် ပိုအားကောင်းလာပါတယ်။

UNITA ပါတီကို စတုတ္ထအကြီးဆုံးပါတီဖြစ်တဲ့ ဘလိုကိုဒီမိုကရက်တီကိုပါတီ အပါအဝင် တခြားအဖွဲ့အများအပြားက ကျောထောက်နောက်ခံပြုထားပါတယ်။

အင်ဂိုလန်နိုင်ငံသား ၁၄ သန်းကျော်ဟာ မဲပေးခွင့်ရှိပြီး သမ္မတနဲ့ လွှတ်တော်အမတ် ၂၂၀ ကို မဲစာရွက်ပေါ်မှာ အမှတ်ခြစ်တခုတည်းနဲ့ တပြိုင်နက် ရွေးချယ်သွားမှာ ဖြစ်ပါတယ်။

မဲသမာမှုတွေကို စိုးရိမ်နေရလို့ မဲပေးပြီးရင် မဲရုံအနီးမှာ ရွေးကောက်ပွဲလုပ်ငန်းစဉ်ကို စောင့်ကြည့်ဖို့ မဲဆန္ဒရှင်တွေကို UNITA က တိုက်တွန်းထားပါတယ်။

လက်ရှိ အာဏာရပါတီ MPLA က အများစု ထိန်းချုပ်ထားတဲ့ ရွေးကောက်ပွဲကော်မရှင်ကတော့ ရွေးကောက်ပွဲဟာ တရားမျှတပြီး ပွင့်လင်းမြင်သာမှု ရှိလိမ့်မယ်လို့ ပြောထားပါတယ်။