နည်းပြစကော့ပါကားကို ထုတ်ပယ်ခဲ့တဲ့ ဘုန်းမောက်အသင်းပိုင်ရှင်ကို လီဗာပူးနည်းပြ ယာဂန်ကလော့ပ်က ဝေဖန်သွားပါတယ်။

လီဗာပူးအသင်းဟာ စနေနေ့က ကစားခဲ့တဲ့ ပရီးမီးယားလိဂ်ပွဲစဉ်မှာ ဘုန်းမောက်အသင်းကို ၉ ဂိုး ဂိုးမရှိနဲ့ အနိုင်ယူခဲ့တာပါ။

အဲဒီပွဲစဉ်အပြီး ဘုန်းမောက်နည်းပြ စကော့ပါကားကို အသင်းတာဝန်ရှိသူတွေက ရာထူးကနေ ထုတ်ပယ်ခဲ့တာပါ။

အဲဒီအပေါ်မှာ နည်းပြကလော့ပ်က ဝေဖန်သွားခဲ့ပြီး စကော့ပါကား ထုတ်ပယ်ခံရတဲ့သတင်း ကြားအပြီးမှာ မှန်ကန်တဲ့ အသင်းပိုင်ရှင်တွေရှိဖို့ လိုအပ်နေတယ်ဆိုတာကို သိမြင်လာခဲ့ကြောင်း ကလော့ပ်က ပြောပါတယ်။

နော်တင်ဟမ်ဖောရက်နဲ့ ဖူဟမ်တို့လို တခြားတန်းတက်အသင်းတွေက ငွေကြေးအများအပြား အသုံးပြုနေချိန်မှာ ဘုန်းမောက်အသင်းက ငွေကြေးသုံးစွဲမှု သိပ်မရှိတာဟာ နည်းပြတဦးအတွက် ခက်ခဲမှာဖြစ်ပြီး စကော့ပါကားအတွက် စိတ်မကောင်းဖြစ်မိကြောင်း နည်းပြကလော့ပ်က ပြောသွားပါတယ်။

အင်္ဂလန်ကွင်းလယ်လူဟောင်း ပါကားဟာ ဖူဟမ်အသင်းကိုလည်း ကိုင်တွယ်ဖူးပြီး ၂၀၂၁ ခုနှစ် ဇွန်လကမှ ဘုန်းမောက်ကို စတင်တာဝန်ယူခဲ့တာ ဖြစ်ပါတယ်။