အသင်းရလဒ်မကောင်းခဲ့တဲ့အပေါ် တာဝန်ယူကြောင်း ဗီလာနည်းပြ စတီဗင်ဂျရတ်က ပြောပါတယ်။

အက်စတွန်ဗီလာအသင်းဟာ နောက်ဆုံး ၄ ပွဲမှာ ၃ ပွဲအထိ ရှုံးနိမ့်ခဲ့ပြီး ရာထူးကနေ ထုတ်ပယ်ဖို့အထိ ဗီလာပရိသတ်တွေက တောင်းဆိုခဲ့ကြတာပါ။

နည်းပြဂျရတ်ကတော့ ဒီလိုခက်ခဲတဲ့အချိန်တွေကို ကစားသမားဘဝကတည်းက ရင်းနှီးလာခဲ့ပြီးသားဖြစ်ကြောင်း၊ လက်ရှိဖြစ်ပေါ်နေတဲ့ စိန်ခေါ်မှုတွေ၊ ဖိအားတွေကို ရင်ဆိုင်ဖြေရှင်းသွားမှာဖြစ်ပြီး ဝေဖန်မှုတွေ အားလုံးကိုလည်း လက်ခံကြောင်း ဂျရတ်က ပြောပါတယ်။

“ဒီအခြေအနေကို စိတ်ဝင်စားစရာ စိန်ခေါ်မှုအဖြစ် မြင်ထားတယ်။ ဘာမှ တုန်လှုပ်နေစရာလည်း မလိုပါဘူး။ ခေါင်းမော့ ရင်ကော့ပြီး အခြေအနေတွေအားလုံးကို ရင်ဆိုင်ကျော်ဖြတ်သွားပါမယ်။ ကစားသမားတွေ အပေါ်မှာလည်း ယုံကြည်ပါတယ်” လို့ ဂျရတ်က ပြောပါတယ်။

ဗီလာအသင်းဟာ စက်တင်ဘာ ၁ ရက် မနက်ပိုင်းမှာ အမှတ်ပေးဇယားဦးဆောင်သူ အာဆင်နယ်အသင်းနဲ့ ယှဉ်ပြိုင်သွားရမှာ ဖြစ်ပါတယ်။