ယူကရိန်းသမ္မတ ဇလန်းစကီးနဲ့ အမေရိကန် အထက်လွှတ်တော်အမတ်တွေ ဖြစ်ကြတဲ့ အေမီ ကလိုဘုချာ၊ ရော့ဘ် ပေါ့မင်းတို့ ဩဂုတ် ၃၀ ရက်က ယူကရိန်းမြို့တော် ကိယက်ဗ်မှာ တွေ့ဆုံခဲ့ပါတယ်။

အမေရိကန်အထက်လွှတ်တော်အမတ်တွေ ကိယက်ဗ်အထိ လာရောက်ပြီး ထောက်ခံမှု ပြသတာကို ကျေးဇူးတင်တဲ့အကြောင်း ယူကရိန်းသမ္မတက ပြောပါတယ်။

“အမေရိကန် အထက်လွှတ်တော်အမတ်တွေ လာတာကို ကျေးဇူးတင်ပါတယ်။ အမေရိကန်နိုင်ငံရဲ့ လွှတ်တော်နှစ်ရပ်စလုံးက ထောက်ခံတာဟာ အဖိုးမဖြတ်နိုင်တဲ့ ကိစ္စပါပဲ” လို့ ဇလန်းစကီးက သူရဲ့ တယ်လီဂရမ်မှာ ရေးသားထားပါတယ်။

ရှေ့တန်းစစ်မျက်နှာအခြေအနေကို အသေးစိတ် ဆွေးနွေးတယ်လို့လည်း ရေးသားထားပါတယ်။ တွေ့ဆုံမှုအပြီးမှာ လက်ဆောင်ပစ္စည်းတွေ အပြန်အလှန် လဲလှယ်ခဲ့ကြပါတယ်။

ဒီအတောအတွင်းမှာ သမ္မတ ဇလန်းစကီးက ယူကရိန်းတပ်တွေ တောင်ပိုင်းကို ပြန်သိမ်းဖို့ ထိုးစစ်ဆင်နေပြီဖြစ်လို့ ရုရှားစစ်သားတွေ အသက်ဘေးကနေ လွတ်အောင် ထွက်ခွာပေးကြဖို့ တိုက်တွန်းခဲ့ပါတယ်။

ဒါပေမဲ့ ရုရှားဘက်ကတော့ ယူကရိန်းတပ်တွေကို အလုံးအရင်း ကျဆုံးအောင် ပြန်တိုက်နိုင်တယ်လို့ ဆိုပါတယ်။ ယူကရိန်းဟာ ရုရှားတပ်တွေရဲ့ ထောက်ပို့လမ်းကြောင်းတွေကို လေကြောင်းတိုက်စစ်ကို သုံးပြီး အတန်ကြာ ဖြတ်တောက်ထားခဲ့ပြီးတဲ့နောက်မှာ တနင်္လာနေ့က မြေပြင်ထိုးစစ်ကို စတင်ခဲ့တာ ဖြစ်ပါတယ်။