ရာနဲ့ချီတဲ့ ဟေတီနိုင်ငံသားတွေဟာ မြို့တော် ပို့ထ်အူပရင့်စ်ရဲ့ လမ်းတွေပေါ်မှာ ဩဂုတ် ၃၀ ရက်က ချီတက်ခဲ့ကြပြီး ရာဇဝတ်မှုတွေ ကြီးထွားလာတာနဲ့ ကုန်ဈေးနှုန်းတွေ မြင့်တက်လာတာကို ကန့်ကွက်ဆန္ဒပြခဲ့ကြပါတယ်။

ဓာတ်ဆီဆိုင်တွေမှာ လူတွေစုရုံးပြီး လောင်စာဆီဘူးတွေကို ဆီဖြည့်ဖို့ အသဲအသန် ကြိုးပမ်းနေချိန်မှာ လမ်းဘေးအတားအဆီးတွေပေါ်က တာယာတွေကို မီးရှို့ခဲ့ကြပါတယ်။

စျေးကြီးတဲ့ လူနေမှုစရိတ်တွေ၊ လောင်စာဆီဈေးနှုန်းတွေဟာ ဓနရှင်လူတန်းစားတွေ ခြယ်လှယ်တာကြောင့် မြင့်တက်လာတာလို့ ဆန္ဒပြသူ အနုပညာရှင် ခေဘာ့တ် ဘတ်စယံက ပြောပါတယ်။

ဝန်ကြီးချုပ် အေရီရယ် ဟင်နရီ ရာထူးကနေ နုတ်ထွက်ပေးဖို့ တောင်းဆိုထားတယ်လို့ အမည်မဖော်လိုသူ တခြားဆန္ဒပြသူတယောက်က ရိုက်တာသတင်းဌာနကို ပြောပါတယ်။

အခုလအစောပိုင်းမှာ ဟေတီဗဟိုဘဏ်က ငွေကြေးဖောင်းပွမှုဟာ ၁၀ နှစ်တာအတွင်း အမြင့်ဆုံးအဆင့်ကို ရောက်သွားပြီလို့ အစီရင်ခံခဲ့ပါတယ်။

မကြာသေးမီ သီတင်းပတ်တွေအတွင်း ဟေတီနိုင်ငံသားတွေဟာ လောင်စာဆီရှာဖို့ ရုန်းကန်ခဲ့ရပြီး တချို့က အလုပ်မလုပ်နိုင်တော့ပါဘူး။

ဟေတီမှာ လောင်စာဆီဈေးချပေးမယ့် ထောက်ပံ့ကြေးတွေရဖို့ လောင်စာတင်သွင်းသူတွေ ရုန်းကန်နေရပြီး ဗဟိုဘဏ်ဆီက ဒေါ်လာရဖို့ အခက်အခဲတွေကြောင့် နိုင်ငံရဲ့ စက်သုံးဆီသိုလှောင်မှု နည်းပါးသွားတယ်လို့ အခြေအနေကိုသိတဲ့ ရင်းမြစ်နှစ်ခုကို ကိုးကားပြီး ရိုက်တာသတင်းမှာ ဖော်ပြပါတယ်။