စစ်ကိုင်းတိုင်း၊ ခင်ဦးမြို့နယ်က စစ်ကောင်စီတပ် ဩဂုတ် ၃၁ ရက်မှာ ကြားဖြတ် ၂ ကြိမ်တိုက်ခိုက်ခဲ့ပြီး စစ်ကောင်စီတပ်ဖွဲ့ဝင် ၂၀ ထက်မနည်း သေဆုံးတယ်လို့ ဒေသခံပြည်သူ့ကာကွယ်‌ရေးခေါင်းဆောင်တွေက ပြောပါတယ်။

ဩဂုတ် ၃၁ ရက် နေ့လယ် တကြိမ်နဲ့ ညနေတကြိမ် တိုက်ပွဲဖြစ်ပွားခဲ့တာလို့ ပြည်သူကာကွယ်ရေးတပ်ဖွဲ့ဝင်တဦးက ပြောပါတယ်။

“ဒီနေ့ ၁၃ နာရီလောက်မှာ ပျဉ်ထောင်ရွာကနေ စစ်ကြောင်းထွက်မယ်လို့ အတွင်းသတင်းရတာနဲ့ ကျနော်တို့ ရွှေကူတဲစုရွာဘက်ကနေ ကြိုတင်စောင့်ပြီး ပြောက်ကြားတိုက်ခိုက်တာတွေ လုပ်ခဲ့တယ်။ အဲတိုက်ပွဲက စစ်ကောင်စီနဲ့ ပျူ ၁၀ ဦးကျဆုံးပြီး အများအပြားဒဏ်ရာရသွားတယ်။ အဲဒဏ်ရာရတဲ့သူတွေကို ရေဦးဆေးရုံပို့ဖို့ရာ ရေဦးက စစ်ကောင်စီတပ်တွေကို လမ်းရှင်းဖို့ ခေါ်တယ်ထင်တယ်ဗျ။ ညနေပိုင်း ၅ နာရီလောက်ရောက်တော့ ရေဦးမြို့ ကြာပတ်အဝိုင်းကနေ စစ်ကောင်စီတပ်သား ၁၃ ဦး လက်နက်အပြည့်အစုံနဲ့ ရေဦးတံတားပေါ်ကနေ ခင်ဦးဘက်တက်လာတယ်။ အဲတာည်း မိုင်းကြိုဆွဲနိုင်ခဲ့တယ်။ အဲလိုဆွဲလိုက်လို့ ၁၀ ယောက်ကတော့ နေရာကနေ မထနိုင်ကြတော့ဘူး။ ကျန်တဲ့ ၃ ယောက်ကတော့ လက်နက်တွေနဲ့ ရမ်းပစ်ခတ်နေတယ်။” 

နေ့လယ်ပိုင်းတိုက်ပွဲကို မြို့နယ်တပ်ရင်းနဲ့ ပကဖတို့ ဦးဆောင်ပြီး N.L.G.R.F အဖွဲ့၊ ရောင်နီပြောက်ကျားအဖွဲ့၊ Dynamite Squad အဖွဲ့၊ နယ်မြေခံ local အဖွဲ့စည်းတွေ ပူးပေါင်တိုက်ခိုက်ခဲ့တာဖြစ်ပြီေ ညနေဖောက်ခွဲတိုက်ခိုက်မှုကို Khin U Support Organization-KSO၊ KhinU Dog Killers-KDK၊  Wolf Guerrilla (Ye U) နဲ့ မဟာမိတ်အဖွဲ့တွေက ပြုလုပ်ခဲ့တာလို့ ဆိုပါတယ်။

စစ်ကိုင်းနဲ့ မကွေးတိုင်းက ပြည်သူ့ကာကွယ်ရေးအဖွဲ့တွေနဲ့ ဖြစ်ပွားတဲ့ တိုက်ပွဲတွေနဲ့ပတ်သက်ပြီး စစ်ကောင်စီက သတင်းထုတ်ပြန်ပေးလေ့မရှိသလို ခင်ဦးမြို့နယ်တိုက်ပွဲမှာ စစ်ကောင်စီဘက်က အကျဆုံးစာရင်းကို ဒီဗွီဘီက သီးခြားအတည်မပြုနိုင်သေးပါဘူး။