စစ်အာဏာသိမ်းပြီးနောက် ၁၈ လအတွင်း နိုင်ငံတဝန်း တိုက်ပွဲ ၆,၆၀၀ ကျော် ဖြစ်ပွားခဲ့တယ်လို့ ISP Myanmar က သတင်းထုတ်ပြန်ထားပါတယ်။

စစ်အာဏာသိမ်းပြီးနောက် နိုင်ငံတဝန်းလုံးမှာ လက်နက်ကိုင်ပဋိပက္ခ တိုက်ခိုက်မှု အကြိမ် ၆,၆၇၈ ကြိမ်ထက်မနည်း ဖြစ်ပွားခဲ့ပြီး စစ်ကောင်စီနဲ့ တိုင်းရင်းသားလက်နက်ကိုင်အဖွဲ့ EAOs အကြား တိုက်ပွဲပေါင်း ၄,၀၅၂ ကြိမ်ထက်မနည်း ဖြစ်ပွားခဲ့တယ်လို့ ထုတ်ပြန်ထားပါတယ်။

ဒါ့အပြင် စစ်ကောင်စီနဲ့ ဒေသခံ ကာကွယ်ရေးတပ်ဖွဲ့ (PDF/LDF/CDF/CNDF/KNDF) စတဲ့ အဖွဲ့အတွေအကြား တိုက်ပွဲ ၁,၇၁၁ ကြိမ်ထက်မနည်းလည်း ဖြစ်ပွားခဲ့ကြောင်း ဖော်ပြပါတယ်။

EAOS တပ်ဖွဲ့အချင်းချင်းကြားလည်း တိုက်ပွဲ ၄၈ ကြိမ်ထက်မနည်း ဖြစ်ပွားခဲ့သလို ၂၀၂၂ မေလအတွင်း ဒေသခံကာကွယ်ရေးတပ်ဖွဲ့နဲ့ EAOs တပ်ဖွဲ့တို့အကြား တိုက်ပွဲ ၁ ကြိမ်ရှိခဲ့ပြီး စစ်ကောင်စီနဲ့ အမည်မသိ လက်နက်ကိုင်တပ်ဖွဲ့တွေအကြား ၃၉ ကြိမ်ထက်မနည်း ဖြစ်ပွားခဲ့တယ်လို့ ဆိုပါတယ်။

စစ်အာဏာသိမ်းပြီးနောက်ပိုင်း နိုင်ငံတဝန်းမှာ ဖြစ်ပွားလာတဲ့ လက်နက်ကိုင်ပဋိပက္ခတွေနဲ့ အကျိုးဆက်တွေကြောင့် အရပ်သား ထိခိုက်သေဆုံးမှုတွေရှိသလို မြန်မာနိုင်ငံတဝန်းမှာ အမျိုးသမီးနဲ့ ကလေးငယ်တွေ အပါအဝင် နေရပ်စွန့်ခွာ ထွက်ပြေးတိမ်းရှောင်ရသူ ဦးရေဟာ ၁ သန်းကျော် ရှိလာခဲ့ပြီလို့ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) ရဲ့ ထုတ်ပြန်ချက်အရ သိရပါတယ်။