အမေရိကန်ရဲ့ “ဒီမိုကရေစီမြှင့်တင်ရေး” အစီအစဉ်အတွက် ရန်ပုံငွေဟာ စွက်ဖက်မှုနဲ့ တရားမဝင်မှု လို့ ကျူးဘားနိုင်ငံက စက်တင်ဘာ ၂ ရက်က ပြစ်တင်ရှုတ်ချလိုက်ပါတယ်။ 

ကျွန်းနိုင်ငံဟာ ဆယ်စုနှစ်တွေအတွင်း အဆိုးရွားဆုံး စီးပွားရေးအကျပ်အတည်းနဲ့ ရင်ဆိုင်နေရချိန်မှာ အစိုးရကို ဖြုတ်ချဖို့ ရည်ရွယ်နေတာလို့လည်း ပြောပါတယ်။

အမေရိကန်ပြည်ထောင်စုရဲ့ ဘိုင်ဒန်အစိုးရအဖွဲ့ဟာ ကျူးဘားမှာ ငြိမ်းချမ်းပြီး အကြမ်းမဖက်တဲ့ ဒီမိုကရေစီ အပြောင်းအလဲကို မြှင့်တင်ဖို့ အမေရိကန်ဥပဒေက ခွင့်ပြုထားတဲ့ ဆယ်စုနှစ်ချီ အစီအစဉ်ရဲ့ တစိတ်တပိုင်းအဖြစ် အစိုးရမဟုတ်တဲ့ အန်ဂျီအိုအဖွဲ့အစည်းတွေနဲ့ လူပုဂ္ဂိုလ်တွေကို ဒေါ်လာ ၆.၂၅ သန်းအထိ ချီးမြှင့်မယ့် လျှောက်လွှာခေါ်ယူမှုတွေကို ဇူလိုင်လက ကြေညာ ခဲ့ပါတယ်။ 

ဆယ်စုနှစ်များစွာအတွင်း ကျူးဘားနဲ့ပတ်သက်တဲ့ ပရောဂျက်တွေအတွက် ကန်ဒေါ်လာ သန်း ၂၀၀ ကျော် သုံးစွဲခဲ့တဲ့ အစီအစဉ်တွေဟာ တကယ်တော့ ကျွန်းပေါ်မှာ ဆူပူအုံကြွမှုတွေ ပေါ်ပေါက် အောင် နိုင်ငံခြားရန်ပုံငွေကို အသုံးချနေတာဖြစ်ကြောင်း ကျူးဘား ဒုတိယ နိုင်ငံခြားရေးဝန်ကြီး Carlos Fernandez de Cossio က ဟာဗားနားမှာ ရိုက်တာသတင်းကို ပြောကြားခဲ့ပါတယ်။ 

မှတ်ချက်ပေးဖို့ တောင်းဆိုချက်ကို အမေရိကန်နိုင်ငံခြားရေး ဝန်ကြီးဌာနက ချက်ချင်း တုံ့ပြန်ခြင်း မရှိပါဘူး။ 

အမေရိကန်နိုင်ငံတကာ ဖွံ့ဖြိုးတိုးတက်ရေးအေဂျင်စီ (USAID) ဟာ ကျူးဘားမှာ အလုပ်လုပ်ရခြင်းရဲ့ စိန်ခေါ်မှုတွေနဲ့ အန္တရာယ်တွေကို သတိပေးပြီး လျှောက်လွှာခေါ်ယူခဲ့ပါတယ်။

အမေရိကန်ပြည်ထောင်စုဟာ နှိပ်စက်ညှဉ်းပန်းခံရသူတွေနဲ့ စွမ်းဆောင်ရည်ရှိတဲ့ ကျူးဘား လူမျိုးတွေကို လူသားချင်းစာနာထောက်ထားမှုဆိုင်ရာ အကူအညီတွေ ပေးအပ်ပေးမယ့် အဖွဲ့ တွေဆီက လျှောက်လွှာတွေကို သတင်းအချက်အလက် လက်လှမ်းမီမှုကနေတဆင့် တောင်းဆိုခဲ့တာပါ။

ဒါပေမယ့် De Cossio က ဒီမိုကရက်တစ်အုပ်စုတွေအတွက် မကြာသေးမီက အမေရိကန်ရဲ့ ရန်ပုံငွေဟာ ကွန်မြူနစ်အုပ်ချုပ်တဲ့ အစိုးရကို ဖြုတ်ချဖို့ အထူးဖန်တီးထားတယ်လို့ ပြောနေတာပါ။

အမေရိကန်ဟာ ကျူးဘားအစိုးရကို ဆန့်ကျင်ရေး ပြည်သူတွေကို တွန်းအားပေးဖို့ အမေရိကန် အခွန်ထမ်းတွေရဲ့ ဒေါ်လာ ၆ သန်းကို အသုံးပြုနေတာလို့ ဆိုပါတယ်။ 

ကျူးဘားဒုတိယနိုင်ငံခြားရေးဝန်ကြီးရဲ့ သောကြာနေ့က ပြောကြားချက်ဟာ ကာလကြာရှည် ရန်သူလိုသဘောထားနေကြတဲ့ အချိန်ကာလ ၄ နှစ်အတွင်း နှစ်နိုင်ငံအကြား ပထမဆုံး အဆင့်မြင့်ဆွေးနွေးပွဲအပြီးမှာ ထွက်ပေါ်လာတာပါ။ 

အခုလည်း ဆက်ဆံရေးတွေ တင်းမာနေဆဲဖြစ်ပြီး ကျူးဘားဟာ လွတ်လပ်စွာပြောဆိုခွင့်ကို ပိတ်ပင်ထားပြီးတော့ ဆန္ဒပြသူတွေကို မှားယွင်းဖမ်းဆီး ထောင်ချနေကြောင်း အမေရိကန်နဲ့ လူ့အခွင့်အရေးအဖွဲ့တွေက စွပ်စွဲထားပေမဲ့ ကျူးဘားက အဲဒီစွပ်စွဲချက်တွေကို ငြင်းဆိုထား ပါတယ်။